पिंपरी चिंचवड : चाकण परिसरात आढळलेल्या एका अनोळखी तरुणाच्या निर्घृण खुनाचा उलगडा करण्यात चाकण उत्तर पोलिसांनी उल्लेखनीय यश मिळवले आहे. तब्बल 20 दिवस अहोरात्र मेहनत, तांत्रिक तपास, गुप्त माहिती संकलन आणि शेकडो लोकांची चौकशी करत पोलिसांनी या गुन्ह्याची गाठ सोडवली. अत्यंत क्लिष्ट आणि आव्हानात्मक असलेल्या या प्रकरणात पोलिसांनी मृतदेहाची ओळख पटवून आईसह तीन आरोपींना अटक केली आहे.
दि. 11 जानेवारी 2026 रोजी मौजे बिरदवडी गावातील स्मशानभूमीच्या मागील ओढ्यालगतच्या निर्जन मोकळ्या जागेत अंदाजे 25 ते 30 वर्षे वयोगटातील एका तरुणाचा मृतदेह आढळून आला होता. मृतदेहाची अवस्था अत्यंत भीषण होती. डोक्यावर धारदार शस्त्राने वार करण्यात आले होते तसेच चेहरा दगडाने ठेचून विद्रूप करण्यात आला होता. त्यामुळे मृताची ओळख पटू नये हा आरोपींचा स्पष्ट हेतू असल्याचे प्रथमदर्शनी दिसून येत होते. खिशातील मोबाईल, ओळखपत्र व इतर वस्तू देखील आरोपींनी काढून घेतल्याने पोलिसांसमोर ओळख पटवण्याचे मोठे आव्हान उभे राहिले.
या घटनेप्रकरणी चाकण उत्तर पोलीस स्टेशन येथे गुन्हा र.नं. 47/2026 बी.एन.एस. कलम 103 (1) अन्वये अज्ञात इसमाविरुद्ध खुनाचा गुन्हा दाखल करण्यात आला. त्यानंतर वरिष्ठ अधिकाऱ्यांच्या मार्गदर्शनाखाली विशेष तपास पथक स्थापन करण्यात आले.
तपासादरम्यान घटनास्थळ परिसरातील सीसीटीव्ही फुटेज तपासण्यात आले. तसेच स्थानिक नागरिक, कंपन्यांतील कामगार, कामगार अड्डे, हॉटेल्स व दुकानदार यांच्याकडे चौकशी करण्यात आली. मृताचे फोटो काढून परिसरात भित्तीपत्रके लावण्यात आली. सोशल मीडियाद्वारे आणि वृत्तपत्रांद्वारे माहिती प्रसारित करून नातेवाईकांचा शोध घेण्यात आला. अनेक बेपत्ता व्यक्तींची नोंद तपासण्यात आली. या सर्व प्रयत्नांमुळे तपासाला दिशा मिळू लागली.
घटनास्थळी सापडलेल्या भौतिक पुराव्यांवरून पोलिसांना एका मोपेड गाडीचा धागा मिळाला. त्या गाडीच्या मालकाकडे चौकशी केली असता त्याने ती गाडी आपला मित्र निखील नानासाहेब चव्हाण याला वापरण्यास दिल्याचे सांगितले. पोलिसांनी निखील यास ताब्यात घेऊन विश्वासात घेऊन चौकशी केली असता संपूर्ण कट उघड झाला.
मृताचे नाव मुंजा धोंडीबा नरहिरे (वय 25 वर्षे, रा. गंगाखेड, जि. परभणी) असे असल्याचे निष्पन्न झाले. आरोपी निखील चव्हाण याची आई उषा चव्हाण हिचे मयताशी अनैतिक संबंध होते. यावरून घरात वाद निर्माण होत होते. मयत तिचा सतत त्रास देत असल्याने आरोपींनी त्याचा कायमचा बंदोबस्त करण्याचा कट रचला. निखीलने आपल्या मित्र स्वप्नील पारधीच्या मदतीने मयताला चाकण येथे बोलावून घेतले. दारू पिण्याच्या बहाण्याने निर्जन स्थळी नेऊन कोयत्याने वार करत निर्दयीपणे खून केला. त्यानंतर ओळख लपवण्यासाठी चेहरा दगडाने ठेचून सर्व वस्तू घेऊन आरोपी फरार झाले.
कोणताही ठोस पुरावा नसताना केवळ तांत्रिक तपास, सातत्यपूर्ण चौकशी आणि पोलिसांच्या चिकाटीमुळे हा गुन्हा उघडकीस आला. पोलिसांच्या या कारवाईमुळे परिसरात सुरक्षिततेची भावना निर्माण झाली असून नागरिकांकडून पोलिसांचे कौतुक होत आहे.
ही उल्लेखनीय कारवाई मा. पोलीस आयुक्त श्री. विनयकुमार चौबे, मा. सहआयुक्त डॉ. शशिकांत महावरकर, मा. अप्पर पोलीस आयुक्त बसवराज तेली, मा. अप्पर पोलीस आयुक्त सारंग आव्हाड, मा. पोलीस उप आयुक्त मारुती जगताप, सहा. पोलीस आयुक्त सचिन कदम यांच्या मार्गदर्शनाखाली वरिष्ठ पोलीस निरीक्षक जितेंद्र कदम, पोलीस निरीक्षक (गुन्हे) विनोद पाटील तसेच तपास पथकातील अधिकारी पोलीस उप निरीक्षक चंद्रशेखर मोरखंडे, सपोफौ सुनिल शिंदे, पो.ह. / भैरोबा यादव, प्रितम ढमढेरे, योगेश कोळेकर, पो.शि./ शिवाजी लोखंडे, महेश कोळी, शरद खैरनार, सुमित जगझाप यांनी केला आहे. पोलिसांच्या सतर्कतेमुळे आणि आधुनिक तपास पद्धतीमुळे गंभीर गुन्ह्यांनाही आळा बसू शकतो, याचे हे ज्वलंत उदाहरण ठरले आहे.
