मावळ (प्रतिनिधी) : आगामी ‘बकरी ईद’ सण शांततेत आणि सुरक्षित वातावरणात पार पडावा यासाठी वडगाव मावळ पोलिसांनी बुधवारी (दि. २८ मे) सायंकाळी शहरातील विविध भागांत भव्य रूट मार्च काढत सुरक्षा सज्जतेचा आढावा घेतला. सायंकाळी ६ ते ७.३० या वेळेत झालेल्या या रूट मार्चमुळे शहरातील नागरिकांमध्ये सुरक्षिततेची भावना निर्माण झाली असून पोलीस प्रशासनाने कोणताही अनुचित प्रकार घडू नये यासाठी कडक खबरदारी घेतल्याचे दिसून आले.
वडगाव मावळ पोलीस स्टेशन हद्दीतील प्रमुख भागांमध्ये हा रूट मार्च काढण्यात आला. पंचायत समिती चौक, श्री पोटोबा महाराज मंदिर परिसर, जमा मस्जिद, ढोरेवाडा, मोरया चौक, छत्रपती शिवाजी महाराज चौक, मिलिंद नगर चौक, कुडेवाडा, चावडी चौक, माळीनगर, केशवनगर तसेच विशाल लॉन्स परिसरात पोलीस पथकाने पायी संचलन करत परिस्थितीचा आढावा घेतला.
या रूट मार्चमध्ये एक पोलीस निरीक्षक, एक सहाय्यक पोलीस निरीक्षक, दोन ग्रेड पोलीस उपनिरीक्षक, १५ पोलीस कर्मचारी आणि १० होमगार्ड सहभागी झाले होते. शहरातील विविध संवेदनशील भागांमध्ये पोलिसांनी नागरिकांशी संवाद साधत शांतता आणि सौहार्द राखण्याचे आवाहन केले.
वडगाव मावळचे पोलीस निरीक्षक शंकर पाटील यांनी सांगितले की, “बकरी ईद सणाच्या पार्श्वभूमीवर कायदा व सुव्यवस्था अबाधित राखण्यासाठी पोलिसांकडून विशेष खबरदारी घेतली जात आहे. कोणत्याही अफवा, गैरप्रकार किंवा अनुचित घटनांवर कठोर कारवाई केली जाईल.”
सणासुदीच्या काळात मोठ्या प्रमाणावर नागरिकांची गर्दी होत असल्याने वाहतूक व्यवस्थापन, संवेदनशील भागांवर विशेष लक्ष, तसेच सोशल मीडियावरील अफवांवर नियंत्रण ठेवण्यासाठीही पोलिसांनी नियोजन केल्याची माहिती देण्यात आली.
रूट मार्चदरम्यान अनेक नागरिकांनी पोलिसांच्या या उपक्रमाचे स्वागत केले. “पोलीस प्रशासन रस्त्यावर उतरल्यामुळे नागरिकांमध्ये विश्वास आणि सुरक्षिततेची भावना निर्माण होते,” अशी प्रतिक्रिया काही स्थानिक नागरिकांनी दिली.
दरम्यान, शहरात सीसीटीव्ही निरीक्षण, गस्त वाढवणे आणि रात्री विशेष तपासणी मोहीम राबवण्याचे आदेशही देण्यात आले आहेत. धार्मिक सौहार्द टिकवून सण शांततेत पार पडावा यासाठी सर्व धर्मीय नागरिकांनी प्रशासनाला सहकार्य करावे, असे आवाहन पोलिसांनी केले आहे.
वडगाव मावळ परिसरात मागील काही वर्षांपासून विविध सण उत्सव शांततेत पार पडत असून यंदाही नागरिक आणि प्रशासनाच्या सहकार्याने बकरी ईद उत्साहात आणि सलोख्याच्या वातावरणात साजरी होईल, असा विश्वास पोलिसांनी व्यक्त केला आहे.
