महाराष्ट्राच्या राजकीय इतिहासात आज नवा अध्याय सुरू झाला. राष्ट्रवादी काँग्रेस पक्षाच्या विधिमंडळ गटनेत्या आणि दिवंगत उपमुख्यमंत्री अजित पवार यांच्या पत्नी सुनेत्रा पवार यांनी महाराष्ट्राच्या पहिल्या महिला उपमुख्यमंत्री म्हणून पद आणि गोपनीयतेची शपथ घेतली. मुंबईतील लोकभवन येथे सायंकाळी पार पडलेल्या या शपथविधी सोहळ्याने राज्याच्या राजकारणात एक ऐतिहासिक क्षण नोंदवला गेला.
या सोहळ्यास मुख्यमंत्री देवेंद्र फडणवीस, उपमुख्यमंत्री एकनाथ शिंदे, राज्य मंत्रिमंडळातील मंत्री, विविध पक्षांचे ज्येष्ठ नेते, आमदार, प्रशासकीय अधिकारी तसेच अनेक मान्यवर मोठ्या संख्येने उपस्थित होते. शपथविधी पूर्ण होताच सभागृहात टाळ्यांचा कडकडाट झाला आणि उपस्थितांनी उभे राहून सुनेत्रा पवार यांचे अभिनंदन केले.
दिवंगत अजित पवार यांच्या आकस्मिक निधनानंतर राज्याच्या राजकारणात निर्माण झालेली पोकळी भरून काढण्याची जबाबदारी स्वीकारत सुनेत्रा पवार यांनी नेतृत्वाची सूत्रे हाती घेतली आहेत. त्यांच्या या शपथविधीमुळे केवळ राष्ट्रवादी काँग्रेस पक्षालाच नव्हे, तर संपूर्ण राज्याच्या राजकारणाला नवी दिशा मिळेल, असा विश्वास राजकीय वर्तुळातून व्यक्त केला जात आहे.
महिला सक्षमीकरणाच्या दृष्टीने हा क्षण अत्यंत महत्त्वाचा मानला जात असून, सत्तेच्या सर्वोच्च पातळीवर महिलांचे प्रतिनिधित्व अधिक बळकट झाले आहे. सुनेत्रा पवार यांच्या निवडीमुळे महाराष्ट्रातील महिलांमध्ये नवचैतन्य निर्माण होईल, असे मत सामाजिक क्षेत्रातील जाणकार व्यक्त करत आहेत.
शपथ घेतल्यानंतर सुनेत्रा पवार यांनी राज्याच्या सर्वांगीण विकासासाठी, सामाजिक न्याय, शेतकरी, महिला, युवक आणि सर्वसामान्य नागरिकांच्या प्रश्नांना प्राधान्य देत कार्य करण्याचा निर्धार व्यक्त केला. त्यांच्या नेतृत्वाकडून राज्यातील जनतेला स्थैर्यपूर्ण, संवेदनशील आणि विकासाभिमुख कारभाराची अपेक्षा आहे.
