मुंबई | महाराष्ट्र राज्याच्या राज्यपाल पदाचा अतिरिक्त कार्यभार स्वीकारण्यासाठी गुजरातचे राज्यपाल आचार्य देवव्रत यांचे रविवारी (दि. १४) मुंबईत सपत्नीक आगमन झाले. अहमदाबाद येथून ‘तेजस एक्स्प्रेस’मधून आलेल्या राज्यपालांचे आणि त्यांच्या पत्नी दर्शना देवी यांचे मुंबईत पाऊल ठेवताच मोठ्या औत्सुक्याने स्वागत करण्यात आले.
मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी मुंबई सेंट्रल स्थानकावर उपस्थित राहून राज्यपाल दांपत्याचे पुष्पगुच्छ देऊन स्वागत केले. या वेळी रेल्वे पोलिसांनी त्यांना मानवंदना दिली. तत्पूर्वी स्थानक परिसरात मोठी गर्दी जमली होती.
यानंतर राज्यपाल दांपत्याचा ताफा राजभवनात पोहोचला. येथे मुंबई पोलिसांच्या तुकड्यांनी शिस्तबद्ध संचलनातून मानवंदना अर्पण केली. संपूर्ण परिसरात भव्य स्वागताचा माहोल होता. महाराष्ट्राच्या राज्यपाल पदाची शपथ आज (सोमवार दि. १५) सकाळी ११ वाजता राजभवनात होणार आहे. या शपथविधी सोहळ्याला राज्यातील मंत्री, खासदार, आमदार, न्यायालयीन अधिकारी तसेच विविध मान्यवर उपस्थित राहणार आहेत.
राज्यपाल आचार्य देवव्रत हे शिक्षण, कृषी आणि सामाजिक कार्य या क्षेत्रांतील योगदानासाठी ओळखले जातात. त्यांच्या पार्श्वभूमीमुळे महाराष्ट्राला नवा दिशा देणारे नेतृत्व मिळेल, अशी अपेक्षा व्यक्त केली जात आहे.
