सिंधुदुर्ग नगरी, ओरस – मुंबई-गोवा महामार्गाच्या निर्मितीसाठी गेल्या १७ वर्षांपासून सतत लढा देणाऱ्या पत्रकारांच्या योगदानाचा सन्मान म्हणून या महामार्गाला “दर्पणकार बाळशास्त्री जांभेकर” यांचे नाव द्यावे, अशी ठाम मागणी अखिल भारतीय मराठी पत्रकार परिषदेचे मुख्य विश्वस्त एस.एम. देशमुख यांनी केली आहे.
बाळशास्त्री जांभेकर यांच्या १७९ व्या पुण्यतिथीनिमित्त ओरस येथील त्यांच्या स्मारकात आयोजित अभिवादन सभेत ही मागणी त्यांनी उपस्थित शंभरांहून अधिक पदाधिकाऱ्यांसमोर मांडली. या वेळी कोकणाचे पालकमंत्री नितेश राणे अध्यक्षस्थानी होते.
बाळशास्त्री जांभेकर – पत्रकारितेचा दीपस्तंभ
देशमुख म्हणाले, बाळशास्त्री जांभेकर हे केवळ आद्य मराठी पत्रकार नव्हते, तर ते विचारवंत, शिक्षक, सामाजिक कार्यकर्ते, भाषाशास्त्रज्ञ आणि कोकणातील तेजस्वी व्यक्तिमत्व होते. त्यांनी ‘दर्पण’ या मराठीतील पहिल्या वृत्तपत्राच्या माध्यमातून समाजात क्रांती घडवली. त्यामुळे केवळ कोकण नव्हे, तर संपूर्ण महाराष्ट्राने त्यांना महामार्गाच्या नावातून सन्मानित करणे ही काळाची गरज आहे.
१७ वर्षांच्या पत्रकार लढ्याचा गौरव करा
“या महामार्गाच्या निर्मितीसाठी पत्रकारांनी 2005 मध्ये वडखळ येथे आंदोलन केले. त्यानंतर 2012 साली काम सुरू झाले, पण ते रखडतच राहिले. पत्रकारांनी हा लढा १७ वर्षे अविरत चालू ठेवला. त्यामुळे हा रस्ता केवळ शासनाचा प्रकल्प नसून पत्रकारांच्या संघर्षातून साकारलेले स्वप्न आहे. त्याला पत्रकाराचे नाव देणे हे औचित्यपूर्ण ठरेल,” असे देशमुख यांनी ठामपणे स्पष्ट केले.
परदेशात पद्धत, भारतात नेत्यांचाच गौरव का?
देशमुख म्हणाले, “युरोप-अमेरिकेत रस्त्यांना विचारवंत, लेखक, पत्रकारांची नावे दिली जातात. भारतात मात्र बहुतांश वेळा केवळ राजकीय नेत्यांची, त्यांच्या नातेवाईकांची नावे दिली जातात. आता हे चित्र पालटण्याची गरज आहे. सरकारने या मागणीवर गांभीर्याने विचार करून एक विधायक पायंडा पाडावा.”
पराड गावात बाबूराव पराडकर यांचेही स्मारक व्हावे
देशमुख यांनी हिंदी पत्रकारितेचे आद्य पुरस्कर्ते बाबूराव पराडकर यांचे कोकणातील पराड गावातील योगदानही अधोरेखित करत त्यांचेही स्मारक उभारावे अशी मागणी यावेळी केली.
नितेश राणेंचे मौन, आश्वासन अपुरे
सभेच्या अध्यक्षस्थानी उपस्थित पालकमंत्री नितेश राणे यांनी “देशमुख यांच्या मागण्या योग्य आहेत आणि त्यावर कार्यवाही करण्याचा मी प्रयत्न करेन,” असे सांगितले असले तरी महामार्गाला बाळशास्त्री जांभेकर यांचे नाव देण्याच्या मुख्य मागणीवर मात्र त्यांनी स्पष्ट भूमिका घेणे टाळले. त्यांच्या मौनामुळे उपस्थितांमध्ये काहीसे नाराजीचे सूर उमटले.
राज्यभरातून पत्रकारांची उपस्थिती, मागणीला राष्ट्रीय स्वरूप
या अभिवादन सभेला राज्यातील विविध जिल्ह्यांतून आलेल्या परिषदेच्या १०० हून अधिक पदाधिकाऱ्यांची उपस्थिती होती. सभेनंतर पत्रकारांनी एकमताने ठराव पास करून ही मागणी सरकारपर्यंत पोहोचवण्याचा निर्णय घेतला.
पत्रकारांचा रस्ता, पत्रकाराला सन्मान – हीच न्याय्य दिशा!
पत्रकारांनी लढून निर्माण केलेल्या रस्त्याला पत्रकारितेचा दीपस्तंभ असलेल्या बाळशास्त्री जांभेकर यांचे नाव देणे, हा फक्त सन्मान नव्हे तर कृतज्ञतेचा अभिव्यक्तीसुद्धा ठरेल. आता सरकारनेही या मागणीला योग्य तो मान द्यावा अशी अपेक्षा व्यक्त होत आहे.
