मुंबई महापालिकेच्या शाळेतील अक्षरा वर्मा हिचा ९६.८०% गुणांसह दहावीत राज्यात डंका; सर्व शाळांमध्ये अव्वल ठरली!

मुंबई :- मुंबई महापालिकेच्या शाळेतून शिक्षण घेत असलेल्या कु. अक्षरा वर्मा हिने इयत्ता दहावीच्या परीक्षेत तब्बल ९६.८०% गुण मिळवून सर्वांनाच अचंबित केले आहे. विशेष म्हणजे, महापालिकेच्या २४८ शाळांमध्ये सर्वाधिक गुण मिळवणारी विद्यार्थिनी म्हणून तिच्या नावाची नोंद झाली आहे.

अक्षरा वर्मा ही एक सर्वसामान्य आर्थिक परिस्थितीत वाढलेली, पण असामान्य इच्छाशक्तीने सजलेली विद्यार्थिनी आहे. घरची परिस्थिती बेताची असतानाही तिने कोणतीही अडचण आडवी येऊ दिली नाही. तिने मेहनत, सातत्य आणि जिद्दीच्या बळावर हे घवघवीत यश मिळवलं. आज तिचा हा प्रवास संपूर्ण मुंबईतील विद्यार्थ्यांसाठी प्रेरणास्रोत ठरत आहे.

 सत्कार व सन्मान सोहळा

तिच्या या प्रेरणादायी यशाबद्दल आज एक छोटेखानी सत्कार समारंभ आयोजित करण्यात आला होता. यावेळी शिवसेना सचिव सुशांत शेलार, तसेच तिचे मार्गदर्शक ‘लक्ष्य अकादमी’चे संचालक प्रसाद सावंत हे विशेष उपस्थित होते. यावेळी अक्षराला पुष्पगुच्छ व प्रमाणपत्र देऊन सन्मानित करण्यात आलं. तिच्या पुढील शिक्षणासाठी शुभेच्छाही देण्यात आल्या.

 कठीण परस्थितीतून शिकत घेतले यश

अक्षराचे वडील खासगी कंपनीत काम करत असून, आई गृहिणी आहे. घरात अभ्यासासाठी योग्य वातावरण नसतानाही तिने दिवसरात्र मेहनत करून अभ्यासात सातत्य ठेवले. शाळेतील शिक्षकांचे मार्गदर्शन, पालकांचे पाठबळ आणि स्वतःची मेहनत या त्रिसूत्रीवर तिचे यश उभे राहिले.

 मार्गदर्शकांचे मत

अक्षराच्या यशावर बोलताना प्रसाद सावंत म्हणाले, “तिच्यातील जिद्द, आत्मविश्वास आणि शिकण्याची आस पाहता आम्हाला आधीच खात्री होती की ती नक्की काहीतरी विशेष करून दाखवेल. ती भविष्यातही उज्वल यश संपादन करेल यात शंका नाही.”

 भावी ध्येय: आयएएस अधिकारी होण्याची महत्त्वाकांक्षा

अक्षराने यानंतर विज्ञान शाखेत प्रवेश घेऊन आयएएस अधिकारी होण्याचे स्वप्न उराशी बाळगले आहे. ती म्हणते, “मी अशा विद्यार्थ्यांसाठी काम करायचं ठरवलं आहे, ज्यांना योग्य संधी मिळत नाही. माझ्या सारख्या परिस्थितीतल्या विद्यार्थ्यांना मदत करण्यासाठी मी प्रयत्नशील राहीन.”