पुणे | १७ एप्रिल २०२५: पुणे शहरात उन्हाची झळ अधिक तीव्र होत चालली असून बहुतेक ठिकाणी तापमान ४० अंश सेल्सिअसच्या वर पोहोचले आहे. हवामान खात्याने ‘हीटवेव्ह’ सदृश परिस्थितीचा इशारा दिला असून पुढील काही दिवस उन्हाचा तडाखा कायम राहण्याची शक्यता वर्तवली आहे.
तपमानात झपाट्याने वाढ:
मंगळवारी शिवाजीनगरमधील स्वयंचलित हवामान केंद्राने ४०.८ अंश सेल्सिअस, तर लोणीकंदमधील केंद्राने ४२.७ अंश सेल्सिअस तापमानाची नोंद केली. ही या हंगामातील आतापर्यंतची सर्वाधिक नोंद आहे.
त्याचबरोबर कोरेगाव पार्क – ४०.५, पाषाण – ४०.५, बारामती – ४०.३, आणि मगरपट्टा – ४०.२ अंश सेल्सिअस तापमान नोंदले गेले.
शहरातील वाढलेली वाहतूक व झपाट्याने होत असलेले शहरीकरण यामुळे काही भाग, विशेषतः लोणीकंद, हे सतत अधिक उष्ण राहतात. अशा वातावरणात सामान्य माणसाच्या आरोग्यावर घातक परिणाम होण्याची शक्यता वाढते.
काही दिवसांपूर्वी ढगाळ हवामान व थोड्याशा पावसाने दिलासा दिला होता, पण आता तो परिणाम पूर्णतः नाहीसा झाला आहे.
IMD चा इशारा:
माजी हवामान अंदाज प्रमुख डॉ. अनुपम कश्यपी यांनी सांगितले की, राजस्थान, गुजरातसह महाराष्ट्र, मध्य प्रदेश आणि छत्तीसगडमध्ये हीटवेव्हसदृश परिस्थिती निर्माण होणार आहे. उत्तर-पश्चिम महाराष्ट्रात विशेषतः जास्त तापमानाचा धोका आहे.
हीटवेव्ह म्हणजे काय?
IMD नुसार, जेव्हा तापमान ४० अंश सेल्सिअसच्या वर जाते आणि सरासरी तापमानापेक्षा ४.५ ते ६.४ अंशांनी जास्त वाढ होते, तेव्हा त्यास ‘हीटवेव्ह’ असे म्हणतात.
आरोग्यावर परिणाम:
सततच्या उष्णतेच्या संपर्कात राहिल्यास माणसांचे आणि प्राण्यांचे जीव धोक्यात येऊ शकतात. उष्माघात, डिहायड्रेशन, चक्कर येणे अशा समस्या निर्माण होऊ शकतात.
नागरिकांनी काय काळजी घ्यावी?
-
शक्यतो दुपारच्या वेळेस बाहेर जाणे टाळावे
-
शरीराला थंड ठेवणाऱ्या पेयांचे सेवन करावे
-
शक्यतो सुटसुटीत आणि फिकट रंगाचे कपडे घालावेत
-
लहान मुले, वृद्ध आणि पाळीव प्राण्यांची विशेष काळजी घ्यावी
-
घरात पंखा, एसीचा योग्य वापर करून तापमान नियंत्रित ठेवावे
