पुणे, ४ एप्रिल २०२५: दीनानाथ मंगेशकर रुग्णालय आणि संशोधन केंद्राने पुणे मिररमध्ये आलेल्या वृत्तासंदर्भात स्पष्टीकरण दिले आहे. रुग्णालयाने स्थापन केलेल्या तज्ञ समितीने आपला अहवाल सादर करत अनेक महत्त्वाच्या बाबींचा उल्लेख केला आहे.
समितीने केलेले महत्त्वाचे निरीक्षणे:
रुग्णालयाने या प्रकरणाची सखोल चौकशी करण्यासाठी तज्ज्ञांची समिती स्थापन केली असून, या समितीत वैद्यकीय संचालक डॉ. धनंजय केळकर, डॉ. अनुजा जोशी (वैद्यकीय सुप्रिटेंडन्ट), डॉ. समीर जोग (अतिदक्षता विभाग प्रमुख), आणि श्री. सचिन व्यवहारे (प्रशासक) यांचा समावेश करण्यात आला.
या समितीने रुग्णाचे जुने व सध्याचे केस पेपर्स तपासले तसेच संबंधित डॉक्टर व कर्मचार्‍यांचे जबाब नोंदवले. समितीच्या तपासणीत काही महत्त्वाचे निष्कर्ष समोर आले, ज्यामुळे या प्रकरणाला वेगळे वळण मिळाले आहे.
‘सौ. तनिषा सुशांत भिसे’ या रुग्णाबाबत उघड झालेले सत्य:
1) रुग्ण २०२० पासून वेळोवेळी दीनानाथ मंगेशकर रुग्णालयात उपचारासाठी येत होती. 2) २०२२ मध्ये तिने ५०% चॅरिटीच्या लाभासह शस्त्रक्रिया केली होती. 3) २०२३ मध्ये डॉक्टरांनी तिला मूल दत्तक घेण्याचा सल्ला दिला होता, कारण तिच्यासाठी सुरक्षित गर्भधारणा होणे शक्य नव्हते. 4) गर्भवती महिलेसाठी किमान ३ वेळा ANC (प्रसूतीपूर्व तपासणी) आवश्यक असते, मात्र त्या रुग्णाने असे तपासणी करून घेतली नाही.
२८ मार्च २०२५ चा घटनाक्रम:
1) २८ मार्च रोजी सकाळी ११.३० वाजता रुग्ण, तिचा पती आणि नातेवाईक डॉक्टर घैसास यांच्या बाह्यरुग्ण विभागात आले. 2) ती इमर्जन्सी किंवा लेबर रूममध्ये दाखल झाली नव्हती. 3) डॉक्टर घैसास यांनी तिची तपासणी करून तिला कोणत्याही तातडीच्या उपचाराची गरज नसल्याचे स्पष्ट केले. 4) तथापि, संभाव्य धोका लक्षात घेता तिला भरती होण्याचा सल्ला दिला गेला. 5) डॉक्टरांनी NICU डॉक्टरांशी भेट घडवून दिली व कमी वजनाच्या जुळ्या मुलांसाठी २ ते २.५ महिने NICU उपचार गरजेचे असल्याचे सांगितले. 6) या उपचारांसाठी १० ते २० लाख खर्च होऊ शकतो, असेही स्पष्ट करण्यात आले.
आर्थिक मदतीसाठी रुग्णालयाचा सल्ला:
➡️ रुग्णाच्या नातेवाईकांनी डॉक्टर केळकर यांना फोन करून आर्थिक अडचणी सांगितल्या. ➡️ डॉक्टर केळकर यांनी शक्य तेवढे (२ ते २.५ लाख) रुपये भरण्यास सांगितले आणि तेवढ्यावर रुग्ण दाखल करता येईल असे सांगितले. ➡️ सचिन व्यवहारे यांनीही एका नातेवाईकाला फोनवर समान सल्ला दिला. ➡️ रुग्णाच्या कुटुंबाने चॅरिटी विभागात प्रत्यक्ष भेट दिली नाही, त्यामुळे पुढील प्रक्रिया थांबली. ➡️ डॉक्टर घैसास यांनी रुग्णाच्या पतीला ससून हॉस्पिटलमध्ये जाण्याचा सल्ला दिला होता.
रुग्णालय सोडून जाण्याचा निर्णय:
दुपारी एका नर्सने पाहिले की रुग्ण व नातेवाईक बॅग उचलून चालले आहेत. थोड्या वेळाने डॉक्टर घैसास यांनी रुग्णाच्या पतीला फोन केला, पण त्यांनी तो उचलला नाही. यानंतर रुग्णालय प्रशासनाला रुग्णाचे पुढे काय झाले याची कल्पना नव्हती.
पुणे मिररमधील वृत्त आणि वस्तुस्थिती:
🟢 मिररच्या वृत्तानुसार रुग्णाने २८ मार्च रोजी सायंकाळी ५.३० वाजता सूर्या हॉस्पिटल, वाकड येथे दाखल झाली. 🟢 २९ मार्च रोजी सकाळी सिझेरियन झाले, मात्र गुंतागुंतीमुळे तिचा मृत्यू झाला. 🟢 सूर्या हॉस्पिटलने आधीच्या ऑपरेशन व कर्करोगाच्या (कॅन्सर) माहितीसंबंधी नातेवाईकांनी माहिती लपवली असल्याचे नमूद केले आहे.
समितीचा निष्कर्ष:
🔹 जुळ्या गर्भधारणेसारख्या धोकादायक परिस्थितीत रुग्णाने योग्य वैद्यकीय तपासणी केली नाही. 🔹 ६ महिन्यांच्या काळात प्रसूतीपूर्व तपासणीसाठी रुग्णालयात हजेरी लावली नाही. 🔹 आर्थिक मदतीसाठी दिलेल्या सल्ल्याकडे दुर्लक्ष करून रुग्णालयावर चुकीचे आरोप लावले जात आहेत. 🔹 रुग्णाच्या मृत्यूमुळे नातेवाईकांना दुःख झाल्याने त्यांनी चुकीच्या दिशेने तक्रार केली असावी.
