पिंपरी-चिंचवड :- खेळ आणि शिक्षण यांचा सुंदर संगम साधत पिंपळे गुरव येथील पर्णिका रोहित इंदापुरे हिने स्केटिंग नॅशनल चॅम्पियनशिपच्या अंडर-सेव्हन गटात स्थान मिळवले आहे. तिच्या या उल्लेखनीय कामगिरीबद्दल विजयराज नागरी सहकारी पतसंस्थेच्या वतीने भव्य सत्कार सोहळ्याचे आयोजन करण्यात आले.
सन्मानचिन्ह आणि आर्थिक मदतीसह गौरव
पतसंस्थेचे उपाध्यक्ष सूर्यकांत कुरुलकर यांच्या हस्ते पर्णिकाचा सन्मानचिन्ह, पुष्पगुच्छ, मिठाई आणि मदत म्हणून धनादेश स्वरूपात रक्कम देऊन गौरव करण्यात आला. संस्थेचे अध्यक्ष अरुण श्रीपती पवार, खजिनदार सखाराम वालकोळी, व्यवस्थापक युवराज नलावडे, सामाजिक कार्यकर्त्या संजीवनी पुराणिक, तसेच पर्णिकाचे वडील रोहित इंदापुरे, मोठी बहिण समिक्षा इंदापुरे, पतसंस्थेचे पदाधिकारी आणि कर्मचारी मोठ्या संख्येने उपस्थित होते.
मोबाईलच्या युगात खेळाच्या दिशेने मोठे यश
सत्कारप्रसंगी बोलताना सूर्यकांत कुरुलकर म्हणाले, “आजच्या डिजिटल युगात मुलांना मोबाईल आणि इंटरनेटच्या आहारी न जाता खेळाच्या दिशेने वाटचाल करणे खूप गरजेचे आहे. पर्णिकाने मेहनत आणि जिद्दीच्या जोरावर नॅशनल स्केटिंग चॅम्पियनशिपमध्ये आपले स्थान मिळवले आहे. तिच्या पुढील वाटचालीसाठी विजयराज पतसंस्थेच्या वतीने आर्थिक मदत देऊन तिला पाठबळ देण्याचा निर्णय घेतला आहे.”
सामाजिक बांधिलकी जोपासणाऱ्या विजयराज पतसंस्थेचा पुढाकार
विजयराज नागरी सहकारी पतसंस्थेने केवळ बँकिंग सेवांपुरती मर्यादित न राहता, समाजहिताच्या विविध उपक्रमांमध्ये मोलाची भूमिका बजावली आहे.
🔹 माळीन (ता. आंबेगाव) येथे भूस्खलन आपत्तीग्रस्तांना आर्थिक मदत दिली.
🔹 ममता अंध व अपंग अनाथ कल्याण केंद्र, पिंपळे गुरव येथे अन्नधान्य आणि फळ वाटप केले.
🔹 पुलवामा येथे शहीद झालेल्या जवानाच्या कुटुंबास मूळ गाव खानदेश, जळगाव येथे आर्थिक मदत प्रदान केली.
🔹 कोल्हापूर पूरग्रस्तांसाठी मदत निधी उपलब्ध करून दिला.
🔹 कोविड-19 च्या काळात मुख्यमंत्री सहायता निधीसाठी आर्थिक मदत केली.
🔹 निगडी येथील दिव्यांग प्रतिष्ठानच्या सामाजिक विवाह सोहळ्यास सहकार्य केले.
🔹 इर्शाळवाडी (रायगड) भूस्खलन दुर्घटनाग्रस्तांना मदत केली.
🔹 शैक्षणिक तसेच क्रीडा क्षेत्रात उल्लेखनीय यश मिळवलेल्या विद्यार्थ्यांना गौरवून मदत निधी प्रदान केला.
पर्णिकाच्या यशाने प्रेरित होवो पुढची पिढी!
पर्णिकाच्या या उल्लेखनीय यशामुळे पिंपरी-चिंचवडमधील क्रीडा क्षेत्रातील तरुण खेळाडूंना मोठी प्रेरणा मिळेल. नॅशनल लेव्हलवर तिची चमक दिसावी यासाठी समाजातील विविध संस्था आणि उद्योजकांनी अशा गुणवंत खेळाडूंना पाठिंबा द्यावा, असे मत मान्यवरांनी व्यक्त केले.
