मुंबई : महाराष्ट्र विधानसभेच्या आगामी निवडणुकांसाठी संपूर्ण राज्य सज्ज होत असताना, प्रत्येक नागरिकाने आपल्या मतदानाच्या अधिकाराचा योग्य उपयोग करणे आवश्यक आहे. मुंबईकरांनी २० नोव्हेंबर रोजी मतदान केंद्रावर जाताना काही महत्त्वाच्या सूचना आणि नियमांचे पालन करणे महत्त्वाचे आहे.
मतदानाच्या दिवशी करावयाच्या गोष्टी
१. मतदार यादीत नाव तपासा
मतदानासाठी मतदार यादीत नाव असणे अत्यावश्यक आहे. नाव नसल्यास मतदान केंद्रात प्रवेश मिळणार नाही. नाव तपासण्यासाठी पुढील पर्यायांचा वापर करा:
- वेबसाइट: https://electoralsearch.eci.gov.in/
- मतदार हेल्पलाइन: STD कोडसह १९५० वर संपर्क साधा.
- SMS सुविधा: EPIC क्रमांकासह ‘ECI <EPIC क्रमांक>’ १९५० वर पाठवा.
- Voter Helpline App: अँड्रॉइड व आयओएससाठी उपलब्ध.
२. उमेदवारांची माहिती जाणून घ्या
आपल्या भागातील उमेदवारांची माहिती जाणून घेणे महत्त्वाचे आहे. उमेदवारांची यादी पाहण्यासाठी:
- उमेदवारांच्या प्रतिज्ञापत्र पोर्टलला भेट द्या.
- Voter Helpline अॅप वापरा.
- निवडणूक आयोगाच्या वेबसाइटवर जाऊन तपासा.
मतदानासाठी काय घ्यावे?
मतदानासाठी पुढील कागदपत्रांपैकी कोणतेही एक बरोबर असणे आवश्यक आहे:
- EPIC (मतदार ओळखपत्र)
- पासपोर्ट
- वाहन चालविण्याचा परवाना
- सरकारी कर्मचार्‍यांसाठी फोटोसह ओळखपत्र
- बँक किंवा पोस्ट ऑफिसद्वारे जारी केलेली पासबुक
- पॅन कार्ड
- आधार कार्ड
- मनरेगा जॉब कार्ड
- आरोग्य विमा कार्ड
- पेन्शन दस्तऐवज फोटोसह
मतदान प्रक्रिया कशी असते?
- पहिला अधिकारी तुमच्या ओळखपत्राची आणि यादीतील नावाची पडताळणी करतो.
- दुसरा अधिकारी तुमच्या बोटावर शाई लावतो व फॉर्म १७ए वर स्वाक्षरी घेतो.
- तिसऱ्या अधिकाऱाला स्लिप देऊन तुम्ही मतदान यंत्राजवळ जाऊ शकता.
- EVM (इलेक्ट्रॉनिक व्होटिंग मशीन) वर इच्छित उमेदवाराच्या चिन्हासमोर बटन दाबा. तुमच्या मताची खात्री करण्यासाठी VVPAT मशीनवर स्लिप ७ सेकंदांसाठी दिसेल.
NOTA चा पर्याय:
जर कोणत्याही उमेदवारावर विश्वास नसेल, तर EVM वरील “NOTA” हा पर्याय निवडू शकता.
नियम व अटींचे पालन करा
- मतदान केंद्राच्या १०० मीटर परिसरात कोणालाही अनधिकृतपणे प्रवेश करता येणार नाही.
- मोबाइल, कॅमेरे व इतर इलेक्ट्रॉनिक उपकरणे मतदान केंद्रात न्यायची परवानगी नाही.
- प्रचार साहित्य लावणे, मेगाफोनचा वापर करणे, किंवा गोंधळ घालणे यावर बंदी आहे.
लोकशाही मजबूत करण्यासाठी मतदान महत्त्वाचे
मतदान हा लोकशाहीचा आत्मा आहे. प्रत्येक नागरिकाने २० नोव्हेंबर रोजी मतदान करून आपला हक्क बजावावा. आपले मत हा देशाच्या भविष्यासाठी एक महत्त्वाचा निर्णय आहे.
