पिंपरी : पिंपरी-चिंचवड महानगरपालिकेच्या अतिक्रमण निर्मूलन विभागाने शहरातील विविध शाळा व महाविद्यालयांच्या परिसरात विशेष अतिक्रमणविरोधी मोहीम राबवत ३५ अनधिकृत टपऱ्यांवर कारवाई केली. विद्यार्थ्यांच्या आरोग्य, सुरक्षितता आणि शैक्षणिक वातावरणावर विपरीत परिणाम करणाऱ्या अनधिकृत व्यावसायिक उपक्रमांवर लगाम घालण्यासाठी ही कारवाई करण्यात आली.
महापालिकेच्या पथकाने मोरवाडी, आकुर्डी, चिंचवड, जाधववाडी, भोसरी, इंद्रायणीनगर, खराळवाडी, लांडेवाडी, दापोडी, जुनी सांगवी, थेरगाव आणि इतर परिसरातील शाळा व महाविद्यालयांच्या आसपास उभारण्यात आलेल्या टपऱ्यांची पाहणी केली. या पाहणीत अनेक ठिकाणी नियमबाह्य व्यवसाय सुरू असल्याचे निदर्शनास आले. त्यानंतर तत्काळ कारवाई करत ३५ अनधिकृत टपऱ्या हटविण्यात आल्या. विशेष म्हणजे, महापालिकेच्या कारवाईची माहिती मिळताच अनेक टपरीधारकांनी स्वतःहून अतिक्रमणे हटवून प्रशासनाला सहकार्य केले. त्यामुळे अनेक ठिकाणी कोणताही वाद न होता परिसर मोकळा करण्यात यश आले.
शाळा आणि महाविद्यालयांच्या प्रवेशद्वारांजवळ उभारण्यात आलेल्या टपऱ्यांमुळे वाहतुकीची कोंडी, अस्वच्छता आणि विद्यार्थ्यांमध्ये तंबाखूजन्य पदार्थांचे आकर्षण वाढण्याची शक्यता व्यक्त केली जात होती. अनेक पालक आणि नागरिकांकडून याबाबत तक्रारी करण्यात आल्या होत्या. त्या पार्श्वभूमीवर महापालिकेने ही विशेष मोहीम हाती घेतली.
महापालिकेच्या अधिकाऱ्यांनी सांगितले की, ही कारवाई केवळ अतिक्रमण हटविण्यासाठी नसून विद्यार्थ्यांसाठी निरोगी आणि सकारात्मक वातावरण निर्माण करण्याचा एक व्यापक उपक्रम आहे. महाराष्ट्र शासनाच्या तंबाखूमुक्त परिसर धोरणाची प्रभावी अंमलबजावणी करण्यासाठीही अशा कारवाया अत्यंत आवश्यक आहेत.
शाळा परिसरात विक्री होणारे गुटखा, तंबाखू, सिगारेट आणि इतर हानिकारक पदार्थांवर नियंत्रण ठेवण्यासाठी प्रशासनाने विशेष लक्ष केंद्रित केले आहे. विद्यार्थ्यांचे आरोग्य धोक्यात आणणाऱ्या कोणत्याही प्रकारच्या अनधिकृत व्यवसायाला यापुढेही खपवून घेतले जाणार नसल्याचा इशाराही महापालिकेने दिला आहे.
महापालिका आयुक्त डॉ. विजय सूर्यवंशी यांनी स्पष्ट केले की, विद्यार्थ्यांचे सुरक्षित, शिस्तबद्ध आणि सकारात्मक शैक्षणिक वातावरण राखणे ही महापालिकेची सर्वोच्च प्राथमिकता आहे. शहरातील सर्व शैक्षणिक संस्थांच्या परिसरात नियमित तपासण्या करून अनधिकृत टपऱ्या, अतिक्रमणे आणि नियमबाह्य व्यवसायांवर कठोर कारवाई केली जाईल.
या मोहिमेचे नागरिक, पालक आणि शिक्षकांनी स्वागत केले असून विद्यार्थ्यांच्या हितासाठी प्रशासनाने अशा कारवाया सातत्याने सुरू ठेवाव्यात, अशी मागणी होत आहे. पिंपरी-चिंचवड शहराला अधिक सुरक्षित, स्वच्छ आणि विद्यार्थीहितैषी बनविण्यासाठी महापालिकेची ही मोहीम महत्त्वपूर्ण ठरत असल्याचे मत व्यक्त केले जात आहे.
