पिंपरी-चिंचवड | भोसरी : Bhosari येथील गावजत्रा मैदानावर सुरू झालेल्या ‘महापौर चषक राज्यस्तरीय कबड्डी स्पर्धा २०२६’ मुळे संपूर्ण पिंपरी-चिंचवड शहरात क्रीडामय वातावरण निर्माण झाले आहे. पारंपरिक आणि महाराष्ट्राच्या मातीतल्या कबड्डी खेळाला प्रोत्साहन देण्यासाठी आयोजित करण्यात आलेल्या या भव्य स्पर्धेचे उद्घाटन महापौर Ravi Landge यांच्या हस्ते उत्साहात पार पडले. यावेळी बोलताना महापौर रवि लांडगे म्हणाले, “कबड्डी हा महाराष्ट्राच्या संस्कृतीचा अविभाज्य भाग आहे. ग्रामीण भागातील युवा खेळाडूंना मोठे व्यासपीठ उपलब्ध करून देणे आणि त्यांच्यातील प्रतिभेला संधी मिळवून देणे हा या स्पर्धेमागील मुख्य उद्देश आहे. पिंपरी-चिंचवड शहर केवळ औद्योगिकच नव्हे तर क्रीडा क्षेत्रातही अग्रस्थानी राहावे यासाठी महानगरपालिका कटिबद्ध आहे.”
या स्पर्धेला राज्यभरातून मोठा प्रतिसाद मिळाला असून, पुरुष गटातील ३६ आणि महिला गटातील २४ संघांसह तब्बल ८१२ खेळाडूंनी सहभाग नोंदवला आहे. १० मेपर्यंत चालणाऱ्या या स्पर्धेत सामने शिस्तबद्ध आणि सुरळीत पार पडावेत यासाठी ५५ सामनाधिकारी नियुक्त करण्यात आले आहेत.
उद्घाटन सोहळ्यास आमदार Mahesh Landge, आमदार Shankar Jagtap, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, पीएमपीएल अध्यक्ष डॉ. महेश आव्हाड, क्रीडा समिती सभापती कैलास कुटे यांच्यासह विविध मान्यवर, खेळाडू आणि क्रीडाप्रेमी नागरिक मोठ्या संख्येने उपस्थित होते.
आमदार महेश लांडगे म्हणाले, “राज्यस्तरीय स्पर्धांमुळे ग्रामीण भागातील खेळाडूंना आपली क्षमता सिद्ध करण्यासाठी मोठी संधी मिळते. पिंपरी-चिंचवड शहरातील क्रीडा संस्कृती अधिक मजबूत करण्यासाठी अशा स्पर्धा अत्यंत आवश्यक आहेत.”
आमदार शंकर जगताप यांनी युवा पिढीने खेळांकडे करिअरच्या दृष्टीने पाहण्याची गरज व्यक्त केली. “महानगरपालिका विविध सुविधा उपलब्ध करून देत असून, खेळाडूंना प्रोत्साहन देण्यासाठी सातत्याने प्रयत्न सुरू आहेत,” असे त्यांनी सांगितले.
दरम्यान, स्पर्धेतील विजेत्या संघांसाठी आकर्षक रोख पारितोषिकांची घोषणा करण्यात आली आहे. पुरुष व महिला गटातील प्रथम क्रमांकाच्या संघाला प्रत्येकी २ लाख रुपये, द्वितीय क्रमांकासाठी १.५ लाख रुपये, तृतीय क्रमांकासाठी १ लाख रुपये आणि चतुर्थ क्रमांकासाठी १ लाख रुपये बक्षीस देण्यात येणार आहे. याशिवाय, उपउपांत्य फेरीत पोहोचणाऱ्या प्रत्येक संघाला प्रत्येकी २५ हजार रुपयांचे प्रोत्साहनपर बक्षीस दिले जाणार आहे. “दिवसाचा मानकरी”, “उत्कृष्ट चढाई”, “उत्कृष्ट पकड” आणि “अष्टपैलू खेळाडू” अशा वैयक्तिक विभागांमध्येही विशेष पुरस्कार जाहीर करण्यात आले आहेत. स्पर्धेची एकूण बक्षीस रक्कम तब्बल १७ लाख ५० हजार रुपये इतकी आहे.
क्रीडा तज्ज्ञांच्या मते, अशा मोठ्या स्पर्धांमुळे पारंपरिक खेळांना नवे बळ मिळते आणि ग्रामीण भागातील अनेक खेळाडूंना राष्ट्रीय स्तरावर पोहोचण्याची प्रेरणा मिळते. पिंपरी-चिंचवड शहराची क्रीडा ओळख अधिक भक्कम करण्यासाठी महानगरपालिकेचे हे पाऊल महत्त्वाचे मानले जात आहे.
स्पर्धेमुळे शहरातील क्रीडाप्रेमींमध्ये मोठा उत्साह निर्माण झाला असून, दररोज मोठ्या संख्येने नागरिक सामने पाहण्यासाठी उपस्थित राहत आहेत. आगामी काळात आणखी मोठ्या प्रमाणात राष्ट्रीय आणि आंतरराष्ट्रीय दर्जाच्या स्पर्धांचे आयोजन करण्याचा मानसही आयोजकांनी व्यक्त केला आहे.
