ॲड. बापूसाहेब भोंडे हायस्कूल येथे गीताजयंतीनिमित्त विशेष कार्यक्रमाचे आयोजन करण्यात आले. या कार्यक्रमात तब्बल १,००० विद्यार्थ्यांनी सामूहिकरित्या भगवद्गीतेतील १४व्या अध्यायाचे पठन करून भक्तिमय वातावरण निर्माण केले.
संस्थेच्या सचिव सौ. राधिका भोंडे यांनी विद्यार्थ्यांना भगवद्गीतेचे जीवनातील महत्त्व पटवून देताना चौदाव्या अध्यायामधील “गुणत्रयविभाग” या विषयाचे सखोल विवेचन केले. त्या तीन गुणांच्या (सत्त्वगुण, रजोगुण, तमोगुण) महत्त्वाची ओळख विद्यार्थ्यांना करून दिली.
कार्यक्रमात मान्यवरांची उपस्थिती:
कार्यक्रमाच्या वेळी संस्थेचे अध्यक्ष ॲड. माधवराव भोंडे, सदस्य संजय पुजारी, संजीव वीर, माध्यमिक विभागाच्या मुख्याध्यापिका माधवी थत्ते, पूर्वप्राथमिक व प्राथमिक विभागाच्या मुख्याध्यापिका अंजुम शेख, उपमुख्याध्यापिका तृप्ती गव्हले, पर्यवेक्षिका स्मिता इंगळे, स्मिता वेदपाठक, शशिकला तिकोणे तसेच शिक्षक व विद्यार्थी उपस्थित होते.
कार्यक्रमाचे सूत्रसंचालन अनुप्रिता यादव यांनी केले, तर उपस्थितांचे आभार सोनाली कामे यांनी मानले.
गीतेच्या पठणाची विशेष परंपरा:
दरवर्षी ॲड. बापूसाहेब भोंडे हायस्कूलमध्ये गीतेतील एका अध्यायाचे वर्षभर पठण करून गीताजयंतीला त्याचे सामूहिक वाचन करण्यात येते. यंदा शिक्षक नितीन तिकोणे यांच्या मार्गदर्शनाखाली विद्यार्थ्यांनी १४व्या अध्यायाचे सामूहिक पठण करून गीता जयंती साजरी केली.
गीतेच्या महत्त्वाचा संदेश:
गीतेचे पठण हा आत्मविकास आणि सकारात्मक जीवनशैलीकडे नेणारा मार्ग असल्याचे मत मान्यवरांनी मांडले. विद्यार्थ्यांमध्ये सांस्कृतिक आणि आध्यात्मिक मूल्यांची रुजवण हे या कार्यक्रमाचे मुख्य उद्दिष्ट आहे.
