शनिवारी चेन्नई विमानतळावर ओमान एअरवेजच्या विमानाचे टायर खराब अवस्थेत आढळल्याने तातडीने देखभाल तपासणी करण्यात आली. या विमानात १४६ प्रवासी प्रवास करत होते, मात्र सुदैवाने कोणतीही मोठी दुर्घटना घडली नाही. मुस्कतवरून आलेले हे विमान संध्याकाळी ५:३० वाजता चेन्नईत उतरले. लँडिंगनंतर विमान पार्क केल्यावर तंत्रज्ञांनी नियमित तपासणीदरम्यान मागील डाव्या बाजूच्या टायरमध्ये नुकसान झाल्याचे निदर्शनास आणले.
विमानाचे टायर नेहमीच्या कारच्या टायरसारखे नसतात, त्यामध्ये एक विशेष मजबूत ‘ट्रेड’ असतो, जो लँडिंग आणि टेकऑफच्या वेळी स्थिरता देतो, उष्णतेचा नाश करतो आणि ओल्या धावपट्टीवर सुद्धा योग्य पकड ठेवतो. परंतु, या घटनेत टायरचे बाह्य स्तर खराब झाले असले तरी टायर फुटला नव्हता, त्यामुळे मोठा अपघात टळला.
विमानाचा परतीचा प्रवास रद्द
तपासणीदरम्यान इतर कोणतीही यांत्रिक समस्या आढळली नसली तरी, नवीन टायर मिळण्यापर्यंत विमानाचे उड्डाण पुढे ढकलण्यात आले आहे. सध्या विमान कंपनी मुंबई, दिल्ली किंवा मस्कत येथून नवीन टायरची व्यवस्था करत आहे. यावेळी विमानाच्या परतीचा प्रवास रद्द करण्यात आला असून प्रवाशांना शहरातील विविध हॉटेलमध्ये ठेवण्यात आले आहे.
