लोणावळा : सामाजिक बांधिलकी आणि महिला सक्षमीकरणाचा संदेश देत लोणावळा येथील महिला मंडळाचा वर्धापन दिन अत्यंत उत्साहात आणि जल्लोषात साजरा करण्यात आला. कार्यक्रमाला शहरातील नवनिर्वाचित नगराध्यक्ष, नगरसेवक व नगरसेविका उपस्थित राहून महिला मंडळाच्या कार्याचा गौरव केला.
कार्यक्रमाची सुरुवात उपाध्यक्षा सौ. मेधा वैद्य यांनी सादर केलेल्या ईशस्तवनाने झाली. त्यानंतर महिला मंडळाच्या सर्व कार्यकारिणीच्या हस्ते नवनिर्वाचित नगराध्यक्ष व नगरसेवक-नगरसेविकांचा शाल, श्रीफळ व पुष्पगुच्छ देऊन सत्कार करण्यात आला.
यावेळी बोलताना माननीय नगराध्यक्षांनी महिला मंडळाने दिलेल्या कार्डियाक ॲम्बुलन्स संदर्भातील पत्राचा विशेष उल्लेख केला. त्यांनी आश्वासन दिले की, लोणावळा शहरात लवकरच कार्डियाक ॲम्बुलन्स उपलब्ध करून देण्यात येईल, ज्यामुळे आपत्कालीन वैद्यकीय सेवेला मोठी मदत होणार आहे. या घोषणेने उपस्थितांमध्ये आनंदाचे वातावरण निर्माण झाले.
महिला मंडळाच्या अध्यक्षा सौ. मनीषा बंबोरी यांनी आपल्या भाषणात मंडळ गेली अनेक वर्षे लोणावळ्यातील नागरिकांच्या आरोग्य, सामाजिक उपक्रम आणि महिला सक्षमीकरणासाठी कार्यरत असल्याचे सांगितले. “महिला सबलीकरण आणि सशक्तीकरणासाठी आम्ही नेहमीच पुढाकार घेत राहू,” असे त्यांनी ठामपणे नमूद केले.
कार्यक्रमात महिला सदस्यांसाठी विविध मनोरंजक खेळ व स्पर्धांचे आयोजन करण्यात आले होते. या स्पर्धांमध्ये सुलभा लांबट यांनी प्रथम क्रमांक पटकावला, तर शशी बोरटकर यांनी द्वितीय क्रमांक मिळवला. विजेत्यांना बक्षिसे देऊन गौरविण्यात आले.
कार्यक्रमाचे सूत्रसंचालन सौ. प्रतिमा खळदकर यांनी प्रभावीपणे केले. उपस्थित नगरसेविका सौ. दीपा अगरवाल, सौ. आरती त्रिकोणे, सौ. सोनाली मराठी, सौ. अनिता अंभोरे, सौ. वसुंधरा दुर्गे, सौ. गायत्री रीले, सौ. रेश्मा पाठारे, सौ. स्वप्ना कदम तसेच नगरसेवक श्री. सनीभाऊ घोणे यांनी महिला मंडळाच्या कार्याचे कौतुक केले.
कार्यक्रमाच्या यशस्वी आयोजनासाठी महिला मंडळाच्या सर्व कार्यकारिणीने विशेष मेहनत घेतली. अध्यक्षा सौ. मनीषा बंबोरी, उपाध्यक्षा सौ. मेधा वैद्य, उपाध्यक्षा सौ. उमा मेहता, सेक्रेटरी सौ. प्रतिमा खळदकर, खजिनदार सौ. सुनीता रावण, सहखजिनदार सौ. क्षुतिका राणे आणि सर्व सदस्यांच्या सहकार्यामुळे कार्यक्रम अत्यंत उत्साहपूर्ण वातावरणात पार पडला.
शेवटी उपस्थित सर्वांना अल्पोपहार देऊन कार्यक्रमाची सांगता करण्यात आली. सामाजिक एकोपा, महिला नेतृत्व आणि आरोग्यसेवेबाबतची बांधिलकी यांचा सुंदर संगम या वर्धापन दिन सोहळ्यात पाहायला मिळाला.
