दावोस 2026 मध्ये महाराष्ट्राने जागतिक पातळीवर आपली आर्थिक ताकद पुन्हा एकदा सिद्ध केली आहे. महाराष्ट्र सरकार आणि एसबीजी (SBG) ग्रुप यांच्यात तब्बल 20 अब्ज डॉलर्स (सुमारे 1.65 लाख कोटी रुपये) गुंतवणुकीचा ऐतिहासिक सामंजस्य करार (MoU) करण्यात आला आहे. हा करार मुंबई महानगर प्रदेश विकास प्राधिकरण (MMRDA) आणि SBG Group यांच्यात झाला असून, मुख्यमंत्री देवेंद्र फडणवीस आणि SBG Group चे अध्यक्ष सौरभ बोरा यांच्या उपस्थितीत या करारावर स्वाक्षऱ्या करण्यात आल्या.
हा महत्त्वाकांक्षी प्रकल्प लॉजिस्टिक्स क्षेत्राशी संबंधित असून, त्याचा मुख्य लाभ मुंबई व मुंबई महानगर प्रदेशाला (MMR) मिळणार आहे. या प्रकल्पातून थेट आणि अप्रत्यक्षरित्या सुमारे 4 लाख 50 हजार रोजगार निर्माण होणार असून, युवकांसाठी ही एक मोठी सुवर्णसंधी ठरणार आहे. या गुंतवणुकीमुळे मुंबई महानगर प्रदेशात अत्याधुनिक लॉजिस्टिक्स पार्क, वेअरहाउसिंग हब्स, मल्टी-मोडल ट्रान्सपोर्ट सुविधा, स्मार्ट सप्लाय चेन सिस्टीम्स आणि निर्यात-आयात सुलभ करणाऱ्या पायाभूत सुविधा विकसित केल्या जाणार आहेत. यामुळे मुंबई देशातीलच नव्हे तर आशिया खंडातील प्रमुख लॉजिस्टिक्स केंद्र म्हणून उदयास येण्याची शक्यता आहे.
मुख्यमंत्री देवेंद्र फडणवीस यांनी यावेळी सांगितले की, “महाराष्ट्राला जागतिक गुंतवणुकीसाठी सर्वोत्तम गंतव्यस्थळ बनवण्याचा आमचा संकल्प आहे. लॉजिस्टिक्स क्षेत्रातील ही गुंतवणूक राज्याच्या औद्योगिक विकासाला गती देईल, निर्यात वाढवेल आणि तरुणांसाठी मोठ्या प्रमाणात रोजगाराच्या संधी निर्माण करेल.”
तज्ज्ञांच्या मते, हा करार केवळ आर्थिक गुंतवणूक नसून, महाराष्ट्राच्या पायाभूत सुविधा, व्यापार सुलभता आणि जागतिक स्पर्धात्मकता वाढवणारा मैलाचा दगड ठरणार आहे. “मेक इन महाराष्ट्र” आणि “गतीशक्ती” या संकल्पनांना हा प्रकल्प प्रत्यक्षात बळ देणारा ठरेल, असे मत उद्योग क्षेत्रातून व्यक्त करण्यात येत आहे. दावोस येथे झालेल्या या करारामुळे महाराष्ट्राची ओळख जागतिक गुंतवणूक नकाशावर अधिक ठळक झाली असून, आगामी काळात आणखी मोठ्या आंतरराष्ट्रीय गुंतवणुकीचा मार्ग मोकळा होईल, असा विश्वास व्यक्त केला जात आहे.
