पिंपरी-चिंचवड महानगरपालिका सार्वत्रिक निवडणूक २०२५–२६ साठी महत्त्वाची प्रक्रिया सुरू होत असून, उमेदवारांच्या नामनिर्देशन पत्रे दाखल करण्याची प्रक्रिया मंगळवार, दि. २३ डिसेंबर २०२५ पासून अधिकृतपणे सुरू होणार आहे. या प्रक्रियेमुळे शहराच्या राजकारणात मोठी हालचाल सुरू झाली असून सर्व प्रमुख राजकीय पक्षांसह अपक्ष उमेदवारही तयारीला लागले आहेत.
महापालिका आयुक्त तथा निवडणूक अधिकारी श्रावण हर्डीकर यांनी दिलेल्या माहितीनुसार, निवडणूक आयोगाने निश्चित केलेल्या वेळापत्रकानुसार उमेदवारांना दररोज सकाळी ११ ते दुपारी ३ वाजेपर्यंत नामनिर्देशन पत्रे दाखल करता येणार आहेत. ही प्रक्रिया पूर्णपणे पारदर्शक, सुलभ आणि नियमबद्ध पद्धतीने पार पाडण्यासाठी महापालिकेने विशेष तयारी केली आहे.
निवडणूक प्रक्रिया सुरळीत पार पडावी यासाठी पिंपरी-चिंचवड महापालिकेच्या ८ क्षेत्रीय कार्यालयांमध्ये स्वतंत्र निवडणूक निर्णय अधिकारी कार्यालये सुरू करण्यात आली आहेत. संबंधित क्षेत्रीय कार्यालयांमध्ये प्रभागनिहाय उमेदवारांना ऑफलाईन पद्धतीने नामनिर्देशन पत्रे ३० डिसेंबर २०२५ पर्यंत दाखल करता येणार आहेत. अंतिम दिवशी उमेदवारांना सकाळी ११ ते दुपारी २ वाजेपर्यंत नामनिर्देशन पत्रे स्वीकारली जाणार आहेत.
प्राप्त नामनिर्देशन पत्रांची छाननी बुधवार, दि. ३१ डिसेंबर २०२५ रोजी होणार असून, उमेदवारी माघारी घेण्याची अंतिम तारीख शुक्रवार, दि. २ जानेवारी २०२६ अशी निश्चित करण्यात आली आहे. त्यानंतर शनिवार, दि. ३ जानेवारी २०२६ रोजी चिन्ह वाटप आणि अंतिम उमेदवारांची यादी अधिकृतपणे प्रसिद्ध केली जाणार आहे.
महापालिका सार्वत्रिक निवडणुकीसाठी गुरुवार, दि. १५ जानेवारी २०२६ रोजी प्रत्यक्ष मतदान प्रक्रिया पार पडणार असून, दुसऱ्या दिवशी म्हणजे शुक्रवार, दि. १६ जानेवारी २०२६ रोजी मतमोजणी होणार आहे. या निवडणुकीकडे संपूर्ण महाराष्ट्राचे लक्ष लागले असून, शहरी राजकारणाची दिशा ठरवणारी ही निवडणूक महत्त्वाची मानली जात आहे.
नामनिर्देशन पत्रांची छाननी, वैधता तपासणी, उमेदवारी माघारी घेणे आणि अंतिम उमेदवारांची यादी जाहीर करणे हे सर्व टप्पे निवडणूक आयोगाच्या घोषित कार्यक्रमानुसार काटेकोरपणे राबवले जाणार आहेत. उमेदवारांनी तसेच राजकीय पक्षांनी ठरवून दिलेल्या वेळेचे आणि नियमांचे काटेकोर पालन करावे, असे आवाहन महापालिकेच्या वतीने करण्यात आले आहे. तसेच, नामनिर्देशन दाखल करताना उमेदवारांनी निवडणूक आयोगाच्या नियमांनुसार आवश्यक कागदपत्रे, प्रतिज्ञापत्रे तसेच अनिवार्य शुल्क वेळेत सादर करणे बंधनकारक आहे. नामनिर्देशन प्रक्रियेतील कोणतीही त्रुटी आढळल्यास संबंधित नामनिर्देशन बाद होऊ शकते, याची उमेदवारांनी विशेष दक्षता घ्यावी, असा इशाराही प्रशासनाने दिला आहे.
