पुणे: २०२५ सालच्या संत ज्ञानेश्वर महाराज आणि संत तुकाराम महाराज पालखी सोहळा हा वारकऱ्यांसाठी आस्था व भक्तीचा पर्व असतो. मात्र या पवित्र सोहळ्याच्या पार्श्वभूमीवर काही टोळ्यांनी वारकऱ्यांची श्रद्धा आणि गर्दीचा फायदा घेत मोबाईल चोरी व सोन्याचे दागिने हिसकावण्याचे प्रकार मोठ्या प्रमाणात केले. ही गंभीर बाब लक्षात घेऊन पुणे शहर गुन्हे शाखेच्या युनिट ०५ व ०६ ने केलेल्या चोख नियोजन आणि तडीव तपासामुळे तब्बल २२.५ तोळे सोनं आणि १४ मोबाईल हँडसेटसह २३.९१ लाख रुपयांचा मुद्देमाल हस्तगत करण्यात यश मिळाले आहे.
आंतरराज्यीय आणि परजिल्हा टोळीचा पर्दाफाश
या कारवाईत लातूर जिल्ह्याच्या उदगीर येथील चार महिला आरोपी, एक सोलापूरचा युवक, झारखंडमधील एक तरुण आणि एका विधीसंघर्षित बालकाचा समावेश आहे. यांना पुण्यातील हडपसर, लोणी काळभोर व वानवडी पोलीस ठाण्यातील चोरीच्या गुन्ह्यांप्रकरणी अटक करण्यात आली आहे.
मोठ्या प्रमाणात जप्ती
२२.५ तोळे सोनं – किंमत ₹19,41,310
१४ मोबाईल हँडसेट – किंमत ₹4,50,000 एकूण जप्त मुद्देमाल: ₹23,91,130
कुशल तपास आणि वेळीच कारवाई
या टोळ्यांनी गर्दीचा फायदा घेत मोबाईल चोरी आणि चैन स्नॅचिंग केले होते. मात्र, पोलीस निरीक्षक वाहिद पठाण आणि संजय पतंगे यांच्या नेतृत्वाखाली नितीन मुंढे, कानिफनाथ कारखिले, पल्लवी मोरे, स्वाती तुपे, बाळासाहेब सकटे यांच्यासह गुन्हे शाखेच्या पथकाने केलेल्या गुप्त तपासामुळे ही कारवाई शक्य झाली.
२५ संशयित ताब्यात; १८ जणांवर कारवाई
२० जून रोजी विश्रांतवाडी पोलीस हद्दीत २५ संशयितांना ताब्यात घेण्यात आले. त्यापैकी १८ जणांवर भारतीय दंडविधान संहिता कलम १२८ नुसार कारवाई करण्यात आली असून उर्वरित ७ जण हे अल्पवयीन असल्याने त्यांना त्यांच्या पालकांच्या ताब्यात देण्यात आले.
नागरिकांना आवाहन
पालखी सोहळ्यात ज्यांचे मोबाईल किंवा सोन्याचे दागिने चोरीला गेले आहेत, त्यांनी हडपसर व वानवडी पोलीस ठाण्याशी संपर्क साधावा, असे आवाहन पोलीस प्रशासनाकडून करण्यात आले आहे.
पोलीस दलाचे कौतुकास्पद योगदान
ही कामगिरी मा. पोलीस आयुक्त अमितेश कुमार, अपर आयुक्त रंजनकुमार शर्मा, पोलीस उप-आयुक्त पंकज देशमुख आणि सहाय्यक पोलीस आयुक्त राजेंद्र मुळे यांच्या मार्गदर्शनाखाली पार पडली.
पुणे पोलिसांची सजगता म्हणजे वारकऱ्यांच्या सुरक्षिततेचा निर्धार!
या प्रकरणातून स्पष्ट होते की, वारकऱ्यांच्या सुरक्षिततेसाठी पुणे पोलीस सतर्क असून कोणतीही तडजोड न करता तत्काळ कारवाई करत आहेत. वारकरी आणि नागरिकांनी अशा घटनांबाबत न घाबरता पोलिसांशी संपर्क ठेवावा.
