हगवणे मृत्यू प्रकरणात नवा खळबळजनक खुलासा! चोंधे कुटुंबाचाही ‘ब्लू फिल्म’, छळ, काळी जादू, गांजा प्रकरणात सहभाग!

पुणे | वैष्णवी हगवणे आत्महत्या प्रकरणात दिवसेंदिवस नवे आणि धक्कादायक खुलासे समोर येत असून, आता या प्रकरणाचा थेट संबंध चोंधे कुटुंबाशीही असल्याचं स्पष्ट झालं आहे. सुयश चोंधे आणि त्याचा भाऊ संकेत चोंधे यांनी हगवणे बाप-लेकाला फरार होण्यासाठी मदत केली होती. एवढंच नव्हे, तर चोंधे कुटुंबाविरोधातही त्यांच्या सुना त्रास, छळ, मारहाण, ब्लू फिल्म दाखवणे, काळी जादू आणि गांजा सेवन यांसारख्या गंभीर आरोपांचं सनसनाटी वादळ उठलं आहे.

हगवणे प्रकरणात चोंधे कुटुंबाचा थेट सहभाग

वैष्णवी हगवणे आत्महत्येनंतर सासरे राजेंद्र हगवणे आणि दीर सुशील हगवणे थार गाडीने फरार झाले होते. ही थार गाडी संकेत चोंधेच्या नावावर असल्याचे तपासात उघड झाले आहे. संकेत चोंधे व त्याचा भाऊ सुयश चोंधे यांनी हगवणे बाप-लेकाला पळून जाण्यास मदत केल्याची कबुली मिळाली आहे.

चोंधे कुटुंबावर गंभीर आरोपांची मालिका

• सुयश चोंधे – पत्नीवर ब्लू फिल्म दाखवून शरीरसंबंध ठेवण्यास भाग पाडणे, सासूसमोर गांजा सेवन करणे, धमक्या देणे.

• संकेत चोंधे – पत्नीवर मारहाण, पैशांची मागणी, काळी जादूचा संशय, हुंडाबळ.

• सासू वैशाली व सासरे नरेश चोंधे – सुनांवर अत्याचार, मानसिक छळ, हुंडाबळीसारखे वर्तन.

• कुटुंबीयांविरोधात पोलिस ठाण्यात तक्रारी व महिला आयोगाकडे नोंदवलेली माहिती असूनही अद्याप ठोस कारवाई न झाल्याचा आरोप.

पोलिस व महिला आयोगाची भूमिका संशयास्पद?

चोंधे कुटुंबाविरोधात खडकी व बावधन पोलीस ठाण्यात तक्रारी दाखल असून, महिला आयोगाकडेही सुनेने संरक्षणासाठी धाव घेतली होती. मात्र, तक्रारी नोंदवल्यानंतरही अद्याप कोणतीही कठोर कारवाई झालेली नाही, यामुळे संबंधित यंत्रणांची भूमिका संशयाच्या भोवऱ्यात सापडली आहे.

‘ब्लू फिल्म’, गांजा आणि काळी जादूचे गंभीर आरोप

सुयश चोंधेच्या पत्नीने सांगितले की, “नवरा ब्लू फिल्म दाखवून जबरदस्ती करायचा. गांजा सासूसमोर पीत असत. आम्हाला मानसिक त्रास दिला जात होता. माझ्या मुलीवर परिणाम होतोय. कृपया न्याय द्या.”

दुसरीकडे संकेत चोंधेच्या पत्नीने आरोप केला की, “सासू काळी जादू करत होती. पैशांसाठी सतत मागणी आणि मारहाण होत होती. दोन लाख रुपये आणि सोनं दिलं, तरीही त्रास सुरूच होता.”

गुन्हेगारीचे कुटुंब?

सुयश चोंधेवर आधीच गुन्हा दाखल आहे. आता त्याच्या वडिलांपासून ते भावापर्यंत आणि दोन्ही सूनांनी गंभीर आरोप केल्यानंतर, संपूर्ण कुटुंब गुन्हेगारी जाळ्यात अडकलेलं असल्याचं चित्र स्पष्ट होत आहे.

हगवणे कुटुंबासोबत ‘जोड’ – सामाजिक प्रश्न उभा

राजेंद्र आणि सुशील हगवणे यांना मदत करणं हे केवळ नात्याचं नव्हे तर गुन्हेगारी टोळीचा भाग असल्याचे संकेत पोलिस तपासात दिसत आहेत. यातून महिलांवर होणाऱ्या अत्याचारांविषयी समाजातील गंभीर प्रश्न उभे राहिले आहेत.

सुनांचा एकच आवाज – “आम्हाला न्याय हवा!”

छळ, मारहाण, मानसिक अत्याचार, अश्लीलतेचं अतिक्रमण… या साऱ्याच्या विरोधात पीडित सुना न्यायासाठी झगडत आहेत. “मुलगी शिकवली, सासरी पाठवली आणि तीचं आयुष्य उद्ध्वस्त झालं” अशा पालकांच्या वेदना समाजाला विचार करायला भाग पाडतात.