वडगाव मावळ :- पुणे-मुंबई राष्ट्रीय महामार्गावर पुन्हा एकदा भरधाव वेगाने येणाऱ्या वाहनाने बळी घेतला आहे. वडगाव फाटा येथील छत्रपती संभाजी महाराज चौकात वाहतूक नियमन करत असलेल्या पोलीस कर्मचारी मिथुन वसंत धेंडे (वय ४५, रा. उरुळी कांचन) यांना भरधाव कंटेनरने जोरदार धडक दिली. या भीषण अपघातात त्यांचा जागीच मृत्यू झाला असून पोलीस प्रशासनात शोककळा पसरली आहे.
ड्युटीवर असताना दिला प्राण; कंटेनर चालक फरार
मंगळवारी रात्री वाहतूक नियमन करत असताना मुंबईकडून चाकणकडे भरधाव वेगाने जाणाऱ्या कंटेनरने मिथुन धेंडे यांना जोरात उडवले. या धडकेनंतर त्यांचा मृत्यू जागीच झाला. कंटेनर चालक अपघातानंतर घटनास्थळावर न थांबता वेगाने चाकणच्या दिशेने पसार झाला.
मावळातील जबाबदार अधिकारी होता मृत पोलिस कर्मचारी
मिथुन धेंडे हे सध्या वडगाव पोलीस ठाण्यात कार्यरत होते. याआधी ते कामशेत पोलीस ठाण्यात सेवेत होते. महामार्गावरील वाहतूक नियंत्रणाची जबाबदारी त्यांच्याकडे होती. कायद्याची अंमलबजावणी करताना कर्तव्यावरच त्यांचा बळी गेला, हे अत्यंत दुःखदायक आहे.
अपघाताने नागरिकांमध्ये संतापाची लाट
या चौकात यापूर्वीही अनेक जीवघेणे अपघात झाले असून सुरक्षा उपायांची मागणी सातत्याने करण्यात येत आहे. परंतु अद्यापही गतीरोधक, सीसीटीव्ही, संकेतफलक, स्पीड गन किंवा वाहतूक नियंत्रक यंत्रणा पुरेशा प्रमाणात कार्यरत नाहीत, असा आरोप नागरिकांनी केला आहे. “वाहतूक पोलिसांचा जीव धोक्यात घालून काम करत असताना सुरक्षा नसेल तर सामान्य नागरिकांचे काय?” असा सवाल उपस्थित केला जात आहे.
अधिकाऱ्यांचा भावनिक सूर
वडगाव पोलीस ठाण्याचे पोलीस निरीक्षक कुमार कदम यांनी सांगितले, “मिथुन धेंडे यांना कंटेनरने जोरात धडक दिली. चालक घटनास्थळावर न थांबता निघून गेला. आम्ही तपास सुरू केला आहे.” धेंडे हे मनमिळावू आणि जबाबदार अधिकारी म्हणून ओळखले जात होते. त्यांच्या अचानक निधनाने सहकाऱ्यांमध्ये शोक आणि धक्का व्यक्त होत आहे.
तपास सुरू; कंटेनरचा माग काढण्याचे प्रयत्न
वडगाव मावळ पोलीस सीसीटीव्ही फुटेज तपासत आहेत व कंटेनरचा शोध घेण्यासाठी विविध नाकाबंदी केली आहे. पोलीस प्रशासनाकडून हत्या सदृष अपघात म्हणून गुन्हा दाखल करण्याची शक्यता असून तपास अधिक खोलवर सुरू आहे.
‘ब्लॅक स्पॉट’ ठरतोय वडगाव फाटा चौक?
वडगाव फाटा चौक हे पुणे-मुंबई महामार्गावर वाहतुकीसाठी अत्यंत महत्त्वाचे आणि वर्दळीचे ठिकाण आहे. असे असूनही येथे अनेकवेळा अपघातांची पुनरावृत्ती होते. महामार्ग प्राधिकरण आणि स्थानिक प्रशासनाने येथे स्पीड ब्रेकर, झेब्रा क्रॉसिंग, अ‍ॅक्टिव्ह सिग्नल्स आणि वाहतूक नियंत्रणासाठी स्वतंत्र यंत्रणा उभारण्याची मागणी नागरिक करत आहेत.
शहीद पोलिसाला श्रद्धांजली
मिथुन धेंडे यांच्या कर्तव्य बजावताना दिलेल्या बलिदानाने संपूर्ण पोलीस दल हळहळले आहे.त्यांच्या कुटुंबीयांवर दुःखाचा डोंगर कोसळला आहे.पोलीस महासंचालकांकडून आणि प्रशासनाकडून सर्वतोपरी मदतीचे आश्वासन देण्यात आले आहे.
