मुख्यमंत्री देवेंद्र फडणवीस यांची घोषणाः वेव्हज् २०२५ मध्ये ८,००० कोटींचे गुंतवणूक करार, ‘निफ्टी वेव्हज् इंडेक्स’चा शुभारंभ

मुंबई – “परदेशात शिक्षण घेण्याचे स्वप्न आता इथेच साकार होणार! कारण नवी मुंबईत उभारल्या जाणाऱ्या ‘एज्यू सिटी’मध्ये आंतरराष्ट्रीय दर्जाची विद्यापीठे येणार आहेत,” असे स्पष्ट करत मुख्यमंत्री देवेंद्र फडणवीस यांनी वेव्हज् २०२५ परिषदेमध्ये मोठी घोषणा केली. या परिषदेमध्ये एकूण ८,००० कोटी रुपयांचे विविध सामंजस्य करार झाले, जे राज्याच्या शैक्षणिक, उद्योग, करमणूक आणि डिजिटल इकोसिस्टमसाठी मैलाचा दगड ठरणार आहेत.

‘एज्यू सिटी’ – शिक्षणात क्रांती घडवणारा प्रकल्प

मुख्यमंत्र्यांच्या उपस्थितीत, सिडकोमार्फत युनिव्हर्सिटी ऑफ यॉर्क (इंग्लंड) आणि युनिव्हर्सिटी ऑफ वेस्टर्न ऑस्ट्रेलिया यांच्याशी प्रत्येकी १५०० कोटी रुपयांचे करार झाले. या करारांतर्गत या दोन्ही विद्यापीठांचे कॅंपस नवी मुंबईच्या ‘एज्यू सिटी’मध्ये उभारले जाणार आहेत, ज्यामुळे भारतीय विद्यार्थ्यांना परदेशी शिक्षणाचा दर्जा देशातच मिळणार आहे. “नवीन शैक्षणिक धोरणामुळे भारत आता जगासाठी खुले झाले आहे. ही ‘एज्यू सिटी’ शिक्षण क्षेत्रात भारताला जागतिक केंद्र बनवेल,” असे फडणवीस यांनी नमूद केले.

चित्रपट उद्योगात उंच भरारी – ‘प्राईम फोकस’ व ‘गोदरेज’चे करार

• प्राईम फोकस सोबत ३००० कोटी रुपयांचा करार, जागतिक दर्जाचा स्टुडिओ आणि २५०० थेट रोजगार निर्मिती

• गोदरेज सोबत २००० कोटींचा प्रकल्प, पनवेलमध्ये ‘एए स्टुडिओ’ उभारणी – २५०० पेक्षा अधिक रोजगार

“गोदरेजसारख्या नावाजलेल्या कंपनीच्या माध्यमातून उभारण्यात येणारे स्टुडिओज हे दर्जाचे व जागतिक मानांकन प्राप्त करणारे ठरतील,” असा विश्वास मुख्यमंत्र्यांनी व्यक्त केला.

‘निफ्टी वेव्हज् इंडेक्स’चा मुख्यमंत्री फडणवीस यांच्या हस्ते शुभारंभ

एनएसई इंडायसेस लिमिटेडने ‘वेव्हज् २०२५’ परिषदेत ‘निफ्टी वेव्हज् इंडेक्स’ चे अनावरण केले. या इंडेक्समध्ये ४३ मीडिया, गेमिंग व मनोरंजन कंपन्या समाविष्ट आहेत. “भारतीय क्रिएटिव्ह इकॉनॉमीसाठी हे एक अभूतपूर्व व्यासपीठ असून जागतिक गुंतवणूक आकर्षित करणारा पायाभूत निर्णय आहे,” असे एनएसईचे सीईओ आशिष चौहान यांनी सांगितले.

राज्य शासनाचा दृढ संकल्प: उद्योग, शिक्षण व कला क्षेत्रासाठी सहकार्य

मुख्यमंत्र्यांनी आश्वासन दिले की, “करार केलेल्या सर्व कंपन्यांना राज्य शासनाच्या वतीने आवश्यक ते सर्व सहकार्य दिले जाईल. आपल्याला केवळ संधीच नाही, तर गुणवत्तेसोबत जगभरात नाव कमवायचे आहे.”

प्रमुख मान्यवरांची उपस्थिती

या ऐतिहासिक करार प्रसंगी मुख्य सचिव सुजाता सौनिक, उद्योग सचिव डॉ. पी. अन्बलगन, सिडकोचे अध्यक्ष विजय सिंघल, एमआयडीसीचे सीईओ पी. वेलारासू, उद्योग विकास आयुक्त दीपेंद्र सिंह कुशवाह आदी उपस्थित होते.