पुण्यातील वैष्णवी हगवणे यांच्या निधनानंतर त्यांच्या 9 महिन्यांच्या मुलाचा सांभाळ आजीकडे – बाल कल्याण समितीचा महत्त्वपूर्ण निर्णय

पुणे | पुण्यातील स्व. वैष्णवी हगवणे यांच्या आकस्मिक निधनानंतर त्यांच्या अवघ्या 9 महिन्यांच्या चिमुकल्या मुलगा जनक हगवणे याच्या भवितव्याबाबत मोठा निर्णय घेण्यात आला आहे. जिल्हा बाल कल्याण समितीने जनकचा कायदेशीर ताबा त्यांच्या आजी, श्रीमती स्वाती आनंद कस्पटे यांच्याकडे सोपवला आहे. बालकाच्या सर्वांगीण विकासासाठी योग्य वातावरण उपलब्ध असल्याचे सामाजिक तपासणीत निष्पन्न झाले आहे.

स्व. वैष्णवी हगवणे यांचा मृत्यू ही एक दुर्दैवी घटना ठरली. त्यांच्या पश्चात अवघा 9 महिन्यांचा चिमुकला जनक हगवणे पोरका झाला होता. या पार्श्वभूमीवर जिल्हा बाल संरक्षण अधिकारी कार्यालयाने सादर केलेल्या सामाजिक व कौटुंबिक तपासणी अहवालानुसार, श्रीमती स्वाती कस्पटे या व्यक्तीचा स्वभाव, आर्थिक स्थैर्य, सामाजिक जाणीव आणि कुटुंबातील वातावरण बालकाच्या हितासाठी योग्य असल्याचे स्पष्ट झाले.

 आजी ठरल्या आधारवड:

स्वाती कस्पटे यांनी आधीपासूनच जनकची जबाबदारी स्वीकारलेली होती. बालकाच्या आरोग्याची काळजी, वेळेवर लसीकरण, आहार आणि सुरक्षिततेबाबत त्यांनी दाखवलेली तत्परता आणि संवेदनशीलता लक्षात घेऊन बाल कल्याण समितीने त्यांना ‘Fit Person’ म्हणून मान्यता दिली आहे.

 कायदेशीर ताबा आणि जबाबदारी:

या निर्णयानुसार, जनक हगवणे याचा कायदेशीर ताबा आता अधिकृतपणे त्यांच्या आजीकडे असेल. त्याच्या शिक्षणाची, आरोग्याची, भावनिक पोषणाची आणि सर्वांगीण विकासाची जबाबदारी श्रीमती स्वाती कस्पटे यांची असेल. त्यांना वेळोवेळी आवश्यक मार्गदर्शन व सहकार्य समाजकल्याण विभागामार्फत दिले जाईल.

 समाजाला दिलासा देणारा निर्णय:

हा निर्णय केवळ एका चिमुकल्याच्या सुरक्षित भविष्यासाठी महत्त्वपूर्ण नसून, अशा दुर्दैवी परिस्थितीत समाजाची माणुसकी टिकवून ठेवणारा आहे. बालकाच्या सुरक्षिततेसाठी सामाजिक यंत्रणांनी वेळेवर हस्तक्षेप करणे हे कौतुकास्पद आहे.

हा निर्णय जनकच्या भविष्याला दिशा देणारा ठरेल, अशी अपेक्षा व्यक्त केली जात आहे. अनेक सामाजिक कार्यकर्त्यांनी बाल कल्याण समितीच्या या निर्णयाचे स्वागत केले असून, चिमुकल्या जनकसाठी हा एक नवा सुरुवातीचा टप्पा ठरेल.