पिंपरी-चिंचवड : पिंपरी-चिंचवड महापालिकेचे आयुक्त शेखर सिंह हे ३० एप्रिल ते ७ मे २०२५ या कालावधीत परदेश दौऱ्यावर असून, त्यांच्या अनुपस्थितीत महापालिकेचा संपूर्ण कार्यभार अतिरिक्त आयुक्त प्रदीप जांभळे पाटील यांच्याकडे सोपविण्यात आला आहे. यासंदर्भात राज्य शासनाच्या नगरविकास विभागाच्या वतीने कक्ष अधिकारी शिवाजी चव्हाण यांनी अधिकृत आदेश जारी केले आहेत.
आयुक्त शेखर सिंह सध्या फ्रान्समधील पॅरिस येथे पर्यटनासाठी गेले असून, त्यांनी यासाठी पूर्वपरवानगी घेऊन नगरविकास विभागाकडे अधिकृतपणे रजेसाठी अर्ज केला होता. ही रजा सुमारे आठ दिवसांची असून, या काळात शहरातील महत्त्वाच्या प्रशासकीय कामकाजाची जबाबदारी प्रदीप जांभळे पाटील यांच्यावर येणार आहे.
दरम्यान, महापालिका हद्दीत सध्या नदीसुधार प्रकल्पासंदर्भातील वाद, धार्मिक स्थळांवरील नोटीस कार्यवाहीमुळे उसळलेले आंदोलन, तसेच पाणीपुरवठ्याशी संबंधित नागरिकांच्या वाढलेल्या तक्रारींमुळे शहरातील वातावरण तापलेले आहे. अशा गंभीर पार्श्वभूमीवर आयुक्त शेखर सिंह यांचा पर्यटनासाठी पॅरिसला गेलेला दौरा ही चर्चेची ठिणगी बनली आहे.
सामान्य नागरिक व कार्यकर्ते यांच्यात नाराजीचा सूर दिसून येतो आहे की, शहरातील गरमागर्म विषयांवर त्वरित निर्णय घेण्याची गरज असताना प्रशासनाचे प्रमुख परदेशात गेले आहेत. मात्र, महापालिकेतील सूत्रबद्ध प्रशासनिक कामकाजासाठी प्रदीप जांभळे पाटील यांना अनुभवी अधिकारी म्हणून ओळखले जाते, यामुळे शहरातील कार्यकुशलतेवर परिणाम होणार नसल्याचा विश्वास काही वरिष्ठ अधिकाऱ्यांनी व्यक्त केला आहे.
महत्त्वाचे चालू विषय:
-
नदीसुधार प्रकल्पाविरोधात संतप्त आंदोलने सुरू
-
धार्मिक स्थळांना दिलेल्या नोटिसींमुळे नागरिकांत असंतोष
-
पाण्याच्या तक्रारी दिवसेंदिवस वाढत चाललेल्या
-
गृहप्रवेश प्रमाणपत्र, ड्रेनेज जाळ्याचे प्रश्न प्रलंबित
