प्रतिनिधी – श्रावणी कामत | सिंधुदुर्ग नगरी अखिल भारतीय मराठी पत्रकार परिषदेच्यावतीने देण्यात येणाऱ्या 2024 च्या पत्रकारिता पुरस्कारांची मोठी घोषणा आज सिंधुदुर्ग येथील बाळशास्त्री जांभेकर स्मारकात करण्यात आली. आद्य पत्रकार बाळशास्त्री जांभेकर जीवनगौरव पुरस्कार यंदा ज्येष्ठ पत्रकार मधुकर भावे यांना जाहीर झाला असून, अनेक प्रतिभावान पत्रकारांचा यंदाच्या वर्षी सन्मान होणार आहे.
179व्या पुण्यतिथी निमित्त आयोजित अभिवादन सभेत परिषदेचे मुख्य विश्वस्त एस.एम. देशमुख यांनी ही घोषणा केली. यावेळी परिषदेच्या त्रैमासिक बैठकीचे आयोजनही करण्यात आले होते.
मधुकर भावेंना जीवनगौरव – पत्रकारितेतील पन्नास वर्षांचा ठसा!
मधुकर भावे यांना “आद्य पत्रकार बाळशास्त्री जांभेकर जीवनगौरव पुरस्कार” देण्यात येणार आहे. पत्रकारितेच्या क्षेत्रात त्यांनी अर्धशतकाहून अधिक काळ दिलेलं योगदान, निर्भीड आणि सामाजिक भान असलेली लेखनी, नवोदित पत्रकारांसाठी केलेले मार्गदर्शन यामुळे ते राज्यातील आदर्श ठरले आहेत.
या पुरस्काराचे स्वरूप ₹25,000 रोख रक्कम, मानपत्र, सन्मानचिन्ह, शाल आणि श्रीफळ असे आहे. यापूर्वी हा पुरस्कार गो. वैद्य, दिनू रणदिवे, पंढरीनाथ सावंत, प्रकाश जोशी अशा अनेक दिग्गज पत्रकारांना देण्यात आला आहे. पुरस्कार वितरण सोहळा जुलैच्या पहिल्या आठवड्यात मुंबईत होणार आहे.
इतर पुरस्कार जाहीर – राज्यभरातील पत्रकारांचा गौरव
परिषदेच्या वतीने जाहीर करण्यात आलेल्या इतर पुरस्कारांमध्ये खालील मान्यवर पत्रकारांचा समावेश आहे:
-
आचार्य अत्रे पुरस्कार – महेश म्हात्रे (ज्येष्ठ पत्रकार)
-
शशिकांत सांडभोर पुरस्कार – अभिजित करांडे (इलेक्ट्रॉनिक मिडिया)
-
प्रमोद भागवत स्मृती पुरस्कार – अमेय तिरोडकर
-
भगवंतराव इंगळे स्मृती पुरस्कार – पांडुरंग पाटील, अंमळनेर
-
नागोजीराव दुधगावकर पुरस्कार – सर्वोत्तम गावरस्कर, बीड (संपादक – सुराज्य)
-
दत्ताजीराव तटकरे स्मृती पुरस्कार – दिनेश केळुसकर (संपादक, गोवा सकाळ)
-
सावित्रीबाई फुले पत्रकारिता पुरस्कार (महिला पत्रकार) – सीमा मराठे, सिंधुदुर्ग
-
माणिकराव देशमुख कृषी पत्रकारिता पुरस्कार (नवीन पुरस्कार) – बाळासाहेब पाटील (अँग्रोवन)
-
संतोष पवार स्मृती पुरस्कार (प्रसिद्धी प्रतिनिधींसाठी) – भरत निगडे, पुणे
