पुण्यात दिवसा ढवळ्या दोन ज्येष्ठ महिलांची साखळी चोरी; नागरिकांमध्ये भीतीचं वातावरण!

पहिली घटना – वर्जे, ७ एप्रिल – वर्जे परिसरातील डिगंबरवाडी, वर्जे माळवाडी येथील ८० वर्षांची सरस्वती विनायक मोरे या ज्येष्ठ महिला कॅनरा बँकेसमोरच्या बाकावर बसून मोबाईलवर मुलीशी बोलत होत्या.
त्याचवेळी दोन अज्ञात मोटारसायकलस्वारांनी त्यांच्याजवळ येऊन दिशा विचारण्याच्या बहाण्याने संवाद साधला. क्षणाचाही विलंब न करता, त्यांनी त्यांच्या गळ्यातील सुमारे ₹२०,००० किंमतीची सोनसाखळी हिसकावली आणि दुचाकीवरून पसार झाले.

या प्रकरणी वर्जे पोलीस ठाण्यात गुन्हा दाखल करण्यात आला असून, पोलीस उपनिरीक्षक जगदाळे तपास करत आहेत. अद्याप आरोपींचा थांगपत्ता लागलेला नाही.

दुसरी घटना – सदाशिव पेठ, १२ एप्रिल – सदाशिव पेठेतील ८२ वर्षीय विठाबाई रामकृष्ण ठाकूर या ज्येष्ठ महिला मंदिराजवळ धार्मिक पूजेच्या रांगेत उभ्या होत्या.
याच गर्दीचा फायदा घेत, एक अज्ञात चोरट्याने त्यांच्या गळ्यातील ₹३०,००० किंमतीची सोनसाखळी चोरून नेली.
या प्रकरणी खडक पोलीस ठाण्यात गुन्हा नोंद करण्यात आला असून पोलीस कॉन्स्टेबल एस. व्ही. पाटील पुढील तपास करत आहेत.

पोलीसांचा इशारा आणि नागरिकांची मागणी

या दोन्ही घटनांमुळे पोलीस विभाग सतर्क झाला असून, संवेदनशील भागांमध्ये गस्त वाढवण्यात आली आहे.
पोलीस प्रशासनाने नागरिकांना सावधगिरी बाळगण्याचं आणि संशयास्पद हालचाली तत्काळ कळवण्याचं आवाहन केलं आहे.

 विशेषतः ज्येष्ठ नागरिकांनी –

• गर्दीच्या ठिकाणी अत्यंत सावध राहावं

• मौल्यवान दागिने घालण्याचे टाळावं

• शक्य असल्यास सोबत एखादी व्यक्ती ठेवावी

शहरातील वाढत्या चोरट्यांच्या कारवायांनी चिंता वाढवली!

पुण्यात साखळी चोरीच्या घटना सातत्याने वाढत असून महिलांवर विशेषतः ज्येष्ठ महिलांवर लक्ष केंद्रित केलं जात आहे.
या घटनांमुळे पोलीस यंत्रणेवर विश्वासाचा प्रश्न निर्माण झाला आहे.
नागरिक आणि सामाजिक संस्थांनी एकत्र येऊन सामूहिक जनजागृती आणि सावधगिरी मोहिमा राबवण्याची गरज व्यक्त केली जात आहे.