एप्रिलमध्येच पुण्याला मेसारखी झळ – हवामान विभागाचा गंभीर इशारा, पुढील ४ दिवस उष्णतेचा त्रास कायम राहणार
पुणे – एप्रिल महिना संपण्याआधीच पुणेकरांना उन्हाच्या तीव्र झळा सहन कराव्या लागत आहेत. मंगळवारी (१७ एप्रिल) लोहगावमध्ये कमाल तापमान ४२.९ अंश सेल्सिअसवर पोहोचले, ज्यामुळे हवामान विभागाने ‘हिटवेव अलर्ट’ जारी केला आहे. विशेष म्हणजे शिवाजीनगर, पाषाण, चिंचवड व मगरपट्टा भागातही तापमान ४० अंशांवर गेले आहे.
दिवसाच्या उन्हासोबतच आता रात्रीसुद्धा उकाडा जाणवू लागला असून नागरिकांना त्रासदायक परिस्थितीचा सामना करावा लागत आहे.
पुण्यात उन्हाचे संकट – हिटवेवचा इशारा ‘गंभीर’!
हवामान विभागाने स्पष्ट केले आहे की २२ एप्रिलपर्यंत शहरात तापमान ४० ते ४२ अंशांदरम्यान राहणार असून हवेतील बाष्पमान वाढल्याने उष्णतेचा त्रास अधिक तीव्र होऊ शकतो. त्यामुळे पुणेकरांनी काळजी घेणे अत्यंत आवश्यक ठरते.
पुण्याच्या विविध भागांतील तापमानाची नोंद (१७ एप्रिल):
-
लोहगाव: ४२.९°
-
शिवाजीनगर: ४०.५°
-
पाषाण: ४०.४°
-
चिंचवड: ३९.२°
-
मगरपट्टा: ४०°
लोहगावमध्ये सर्वाधिक तापमानाची नोंद झाल्याने ते पुण्याचे ‘हॉटस्पॉट’ ठरले आहे.
मध्य महाराष्ट्रातील इतर जिल्ह्यांनाही उष्णतेचा धोका:
पुण्यासह धाराशिव, लातूर, नांदेड, हिंगोली, बीड, परभणी, सोलापूर आणि सातारा या जिल्ह्यांनाही ‘हिटवेव अलर्ट’ देण्यात आला आहे. हवामान विभागाच्या अंदाजानुसार, एप्रिलच्या अखेरीस तापमान ४५ ते ४६ अंशांपर्यंत जाऊ शकते, त्यामुळे विदर्भ व मराठवाड्यातही उष्माघाताचा धोका वाढू शकतो.
हवामान विभागाचे नागरिकांना आवाहन – ‘ही’ काळजी घ्या:
-
दुपारी १२ ते ४ या वेळेत शक्यतो घराबाहेर जाऊ नये
-
हलका, पचायला सोपा आहार घ्यावा
-
भरपूर पाणी आणि द्रवपदार्थांचे सेवन करावे
-
डोकं आणि चेहरा झाकूनच बाहेर पडावे
-
टोपी, छत्री, सनग्लासेसचा वापर करावा
-
लहान मुलं, वृद्ध आणि आजारी व्यक्तींनी घरातच राहणे योग्य
