पुण्यात वाहन खरेदी ही केवळ चारचाकी किंवा दुचाकी निवडण्यापुरती मर्यादित राहिलेली नाही, तर त्यावरचा नोंदणी क्रमांक देखील तितकाच महत्त्वाचा ठरतो आहे. आपल्या लकी नंबरसाठी लाखो रुपये मोजण्याची तयारी ठेवणाऱ्या वाहनधारकांमुळे पुणे प्रादेशिक परिवहन कार्यालयाने (RTO) आर्थिक वर्ष २०२४-२५ मध्ये विक्रमी ₹५९.३६ कोटींचा महसूल गोळा केला आहे.
महसुलात मोठी वाढ! मागील वर्षाच्या तुलनेत ₹१२.२२ कोटींची जादा कमाई
गेल्या वर्षी (२०२३-२४) पुणे RTO ने ₹४७.१४ कोटींची कमाई केली होती, तर त्याच्या आधीच्या वर्षी (२०२२-२३) हा आकडा ₹३३ कोटी होता. वाहनधारकांमध्ये फॅन्सी क्रमांकांसाठी वाढती मागणी पाहता, हा महसूल वर्षागणिक झपाट्याने वाढत आहे.
‘१’ नंबरसाठी विक्रमी ₹१८ लाख!
सर्व नोंदणी क्रमांकांमध्ये ‘१’ हा क्रमांक सर्वाधिक लोकप्रिय ठरला आहे. २०२४-२५ या आर्थिक वर्षात एका वाहनधारकाने हा क्रमांक घेण्यासाठी तब्बल ₹१८ लाखांची बोली लावली. याआधी २०२३-२४ मध्ये हाच नंबर ₹१२ लाखांना विकला गेला होता.
ही क्रमांकंही टॉप डिमांडमध्ये!
७, ९, १२, २४, ९०, ९९, १००, १०१, १२१२, २१२१, ७०७०, ९०९० आणि ९९९९ यांसारख्या नंबरसाठी मोठ्या प्रमाणात स्पर्धा पाहायला मिळाली. बोल्यांमध्ये हजारो ते लाखो रुपयांपर्यंत उड्डाण घेतले गेले.
फॅन्सी नंबरसाठी काय आहे प्रक्रिया?
-
इच्छुक वाहनधारकांनी RTO कडे आधीच अर्ज करावा लागतो.
-
निवडलेल्या क्रमांकासाठी निर्धारित शुल्काचा डिमांड ड्राफ्ट सादर करावा लागतो.
-
एकाच क्रमांकासाठी एकापेक्षा अधिक अर्ज असल्यास बोली प्रक्रिया राबवली जाते.
-
जो सर्वाधिक बोली लावतो, त्याला तो क्रमांक दिला जातो.
