लोणावळा – ८ मार्च हा महिला दिन संपूर्ण जगभर मोठ्या उत्साहात साजरा केला जातो. या विशेष दिवशी महिलांच्या सामाजिक योगदानाचा गौरव केला जातो. लोणावळा गिल्डतर्फे देखील या दिवसाचे औचित्य साधून प्रेरणादायी महिलांचा सन्मान करण्यात आला. विशेष म्हणजे या कार्यक्रमात अपंग विद्यार्थ्यांसाठी कार्य करणाऱ्या महिलांचा गौरव करण्यात आला, ज्यामुळे सामाजिक कार्यात महिलांची भूमिका अधिक उजळून निघाली आहे.
लोणावळा गिल्डचे सुनिल शिंदे यांनी आपल्या मनोगतात सांगितले की, “स्त्रिया समाजातील सर्वच क्षेत्रांत महत्त्वपूर्ण योगदान देत आहेत. विशेषत: अपंग विद्यार्थ्यांसाठी त्यांचे योगदान अनमोल आहे. त्यांना शिक्षण देऊन त्यांना स्वावलंबी बनवण्याचे कार्य या महिलांनी केले आहे, त्यामुळे त्या समाजासाठी एक प्रेरणास्थान ठरल्या आहेत.”
यावेळी संवाद शाळेच्या प्राचार्या श्रीमती दामले आणि उपप्राचार्या श्रीमती लापालीकर यांचा शाल, चषक आणि चॉकलेट देऊन सन्मान करण्यात आला. तसेच या संस्थेतील सर्व महिला कर्मचाऱ्यांना पर्स आणि चॉकलेट देऊन गौरविण्यात आले. हा सन्मान मिळाल्याने उपस्थित महिलांच्या चेहऱ्यावर आनंद ओसंडून वाहत होता.
याशिवाय लोणावळा गिल्डने सामाजिक बांधिलकी जपत सर्व मूकबधिर विद्यार्थ्यांना विशेष भेटवस्तू आणि चॉकलेट वितरित केली. हा स्तुत्य उपक्रम केवळ महिला दिनापुरता मर्यादित न ठेवता, संपूर्ण वर्षभर अशा प्रकारच्या उपक्रमांचे आयोजन करण्यात यावे, अशी मागणी उपस्थित मान्यवरांनी केली.
या कार्यक्रमास लोणावळा गिल्डच्या अध्यक्षा रत्नप्रभा गायकवाड, उपाध्यक्षा सायली जोशी, सचिव हेमलता शर्मा, नीतू पुजारी, अंबिका गायकवाड, राजश्री कांबळे, सुलभा खिरे, पूर्वा गायकवाड तसेच श्री. शिवळे, श्रीयुत शिले, श्री. शिवरे आदी मान्यवर उपस्थित होते.
महिला दिनाच्या निमित्ताने लोणावळा गिल्डने घेतलेला हा उपक्रम केवळ एक औपचारिक कार्यक्रम नव्हता, तर समाजासाठी प्रेरणादायी आदर्श ठरला. या महिलांच्या योगदानामुळे समाजात सकारात्मक बदल घडू शकतो, हे या कार्यक्रमाने सिद्ध केले.
