पुणे: पुण्यातील मार्केट यार्ड पोलीस ठाण्याच्या गुन्हे अन्वेषण पथकाने सुमारे ४०,६२,००० रुपये किमतीचे ४७८.१ ग्रॅम सोने हस्तगत करून ते मूळ मालकांच्या ताब्यात दिल्याने मोठी कौतुकास्पद कामगिरी केली आहे.
गुन्ह्याचा तपशील – पोलिसांची कसून चौकशी!
मार्केट यार्ड पोलीस ठाण्यात गु.र.नं. १४७/२४ व गु.र.नं. २६२/२०२३ अन्वये दाखल असलेल्या गंभीर गुन्ह्यांच्या तपासासाठी, पोलीस आयुक्त, अपर पोलीस आयुक्त आणि परिमंडळ ५ चे पोलीस उपआयुक्त यांच्या मार्गदर्शनाखाली वरिष्ठ पोलीस निरीक्षक मनिषा पाटील यांनी या गुन्ह्यांची उकल करण्यासाठी विशेष निर्देश दिले.
गुन्हे उघडकीस आणण्यासाठी पोलिसांचा कसून शोधमोहीम
तपास अधिकारी सहाय्यक पोलीस निरीक्षक अश्विनी पाटील आणि महिला पोलीस अंमलदार सीमा शेंडकर यांनी आपल्या तपास पथकातील पोलीस अंमलदार किरण जाधव, कौस्तुभ जाधव, प्रविण तायडे, मुद्देमाल कारकून सहा. पोलीस अंमलदार अनपट आणि पोलीस अंमलदार नदाफ यांच्या मदतीने सखोल तपास केला.
या तपासादरम्यान गुन्ह्यातील आरोपींना ताब्यात घेऊन त्यांच्याकडून ४० लाख ६२ हजार रुपये किमतीचे ४७८.१ ग्रॅम सोन्याचे दागिने जप्त करण्यात आले.
मुद्देमाल मालकांच्या ताब्यात – फिर्यादींनी पोलिसांचे मानले आभार!
सदर जप्त मुद्देमाल मा. न्यायालयाच्या सर्व कायदेशीर प्रक्रिया पूर्ण करून दिनांक १९ फेब्रुवारी २०२५ रोजी पोलीस उपआयुक्त परिमंडळ ५, पुणे शहर डॉ. श्री. राजकुमार शिंदे यांच्या हस्ते मूळ फिर्यादींना परत करण्यात आला.
या वेळी फिर्यादींनी आपले मनोगत व्यक्त करत मार्केट यार्ड पोलिसांच्या तत्परतेचे आणि प्रामाणिक सेवाभावी वृत्तीचे कौतुक केले. त्यांनी पोलिसांच्या या जलद कारवाईबद्दल आभार मानले आणि नागरिकांना पोलिसांवर अधिक विश्वास ठेवावा, असा संदेश दिला.
पोलिसांच्या सतर्कतेमुळे पुणेकर सुरक्षित!
या कारवाईमुळे मार्केट यार्ड पोलिसांच्या प्रभावी तपास पद्धतीचे आणि कायद्यावरील भक्कम पकडीचे पुन्हा एकदा उदाहरण समोर आले आहे. पुणे शहरात गुन्हेगारीवर आळा घालण्यासाठी पोलिसांचे अथक प्रयत्न सुरू आहेत.
🔹 सोन्याचे व्यवहार करताना आणि मौल्यवान वस्तू जपताना अधिक काळजी घ्या. 🔹 संशयास्पद हालचाली आढळल्यास त्वरित पोलिसांना संपर्क करा. 🔹 नागरिकांनी पोलिसांशी सहकार्य करून गुन्हेगारी रोखण्यासाठी पुढाकार घ्यावा.
