पुणे :– पुणे शहर पोलीस आयुक्तालयाच्या वतीने आयोजित ‘तरंग’ कार्यक्रमाला भव्य प्रतिसाद मिळाला असून, या कार्यक्रमात महाराष्ट्राचे मुख्यमंत्री श्री. देवेंद्र फडणवीस आणि उपमुख्यमंत्री अजित दादा पवार यांनी आपली उपस्थिती दर्शवली. यावेळी मुख्यमंत्र्यांच्या हस्ते ३९ चारचाकी वाहने आणि ‘कॉप-२४ पेट्रोलिंग बाईक’ पथकाचे उद्घाटन करण्यात आले.
मुख्यमंत्री फडणवीस यांनी या वेळी भाषण करताना पुणे शहरातील पोलिस दल अधिक सक्षम करण्यासाठी सरकार कटीबद्ध असल्याचे सांगितले. तसेच, अत्याधुनिक तंत्रज्ञानाने सुसज्ज असलेल्या या नव्या वाहनांमुळे शहरातील कायदा व सुव्यवस्था अधिक प्रभावीरीत्या राखता येईल, असेही ते म्हणाले. “पुणे हे देशातील एक महत्त्वाचे शहर आहे, आणि येथे नागरिकांच्या सुरक्षेसाठी पोलीस दलाचे योगदान मोठे आहे. आम्ही पोलिसांना आणखी आधुनिक साधनसामग्री देण्यासाठी प्रयत्नशील आहोत,” असे त्यांनी नमूद केले.
उपमुख्यमंत्री अजित पवार यांनीही या कार्यक्रमाला संबोधित करताना पुणे पोलिसांच्या कामगिरीची प्रशंसा केली. त्यांनी सांगितले की, “पुणे शहर वेगाने प्रगत होत असून, त्यासोबतच सुरक्षा व्यवस्थेतही सुधारणा होणे गरजेचे आहे. पोलिस दलाला मदत करण्यासाठी राज्य सरकार आवश्यक पावले उचलत आहे.”
‘तरंग’ कार्यक्रमाच्या माध्यमातून नागरिक आणि पोलिस यांच्यातील परस्पर विश्वास वाढवण्याचा प्रयत्न करण्यात आला आहे. पोलिस दलाच्या नव्या ‘कॉप-२४ पेट्रोलिंग बाईक’ पथकामुळे शहरात वेगवान गस्त शक्य होईल, तसेच तातडीच्या परिस्थितीत पोलिसांना घटनास्थळी त्वरीत पोहोचता येईल.
या कार्यक्रमात शहरातील अनेक प्रतिष्ठित व्यक्ती, वरिष्ठ पोलीस अधिकारी, स्थानिक लोकप्रतिनिधी, तसेच मोठ्या संख्येने नागरिक उपस्थित होते. पुणे पोलिस दलाच्या या नव्या पथकामुळे शहरात सुरक्षा यंत्रणा अधिक मजबूत होणार असल्याचा विश्वास व्यक्त करण्यात आला आहे.
