पिंपरी: पिंपरी-चिंचवड महापालिका आणि पोलिसांच्या संयुक्त कारवाईत चिखली येथील कुदळवाडी परिसरातील अनधिकृत बांधकामांवर मोठ्या प्रमाणात हातोडा पडला आहे. गेल्या पाच दिवसांपासून सुरू असलेल्या या मोहिमेत ४६५ एकर क्षेत्रफळावरील २५२८ अनधिकृत बांधकामे जमीनदोस्त करण्यात आली असून, २०१ लाख ५७ हजार चौरस फूट क्षेत्रावर ही कारवाई करण्यात आली आहे.
अतिक्रमणाविरोधात कडक भूमिका, कारवाई अजूनही सुरूच राहणार!
महापालिका आयुक्त शेखर सिंह आणि पोलीस आयुक्त विनयकुमार चौबे यांच्या मार्गदर्शनाखाली ८ फेब्रुवारीपासून ही मोहीम युद्धपातळीवर राबविली जात आहे. यामध्ये पत्राशेड, कारखाने, गोदामे, भंगार दुकाने आणि इतर अनधिकृत बांधकामे हटविण्यात येत आहेत.
आज मोहिमेच्या पाचव्या दिवशी तब्बल ९३ एकर क्षेत्रावर पसरलेल्या ४० लाख ५७ हजार चौ. फूट क्षेत्रफळाच्या ५२८ अनधिकृत बांधकामांवर निष्कासनाची कारवाई करण्यात आली.
मोठ्या यंत्रणेसह कारवाईचा धडाका!
या मोहिमेसाठी १६ पोकलेन, ८ जेसीबी, १ क्रेन, ४ कटर यांचा वापर करण्यात आला. तसेच, ४ कार्यकारी अभियंते, १६ उपअभियंते, १८० महाराष्ट्र सुरक्षा दलाचे जवान, ६०० पोलीस कर्मचारी आणि मजूर यांचा सहभाग होता. सुरक्षा व्यवस्थेसाठी ३ अग्निशमन वाहने आणि २ रुग्णवाहिका तैनात करण्यात आल्या होत्या.
वरिष्ठ अधिकाऱ्यांचे मार्गदर्शन आणि ठोस निर्णय!
या कारवाईदरम्यान अतिरिक्त आयुक्त प्रदीप जांभळे पाटील, उपआयुक्त मनोज लोणकर, क्षेत्रीय अधिकारी राजेश आगळे, सुचेता पानसरे, अमित पंडित, किशोर ननवरे, महेश वाघमोडे, अजिंक्य येळे, शितल वाकडे, श्रीकांत कोळप यांच्यासह विविध विभागांचे वरिष्ठ अधिकारी उपस्थित होते.
याशिवाय, सहआयुक्त शशिकांत महावरकर आणि अतिरिक्त पोलीस आयुक्त वसंत परदेशी यांच्या मार्गदर्शनाखाली कडक पोलीस बंदोबस्त ठेवण्यात आला.
नगरविकासाच्या दृष्टीने मोठे पाऊल!
महापालिका आणि पोलीस प्रशासनाने या मोठ्या मोहिमेत नियोजित विकास आरक्षणे आणि नागरी सुविधांसाठी आरक्षित जागांवरील अतिक्रमणे हटवण्यास सुरुवात केली आहे. ही कारवाई अद्यापही सुरूच राहणार असून, शहराच्या नियोजनबद्ध विकासासाठी अधिक कठोर पावले उचलली जातील, असे प्रशासनाने स्पष्ट केले आहे.
