पुणे, पुणे महानगरपालिकेच्या (PMC) मुख्यालय, प्रादेशिक कार्यालय आणि इतर कार्यालयांच्या आवारात दुचाकी वाहन वापरणाऱ्या सर्व अधिकारी आणि कर्मचार्‍यांसाठी हेल्मेट वापरणे सक्तीचे करण्यात आले आहे. अतिरिक्त आयुक्त प्रितीराज बी. पी. यांनी हा आदेश जारी केला असून, हेल्मेटशिवाय आवारात प्रवेश किंवा वाहन प्रवेशास मनाई करण्यात आली आहे.
देशभरात रस्ते अपघातांची संख्या मोठ्या प्रमाणावर वाढत आहे. यामध्ये दुचाकी अपघातांची संख्या विशेषतः जास्त असून, हेल्मेट न घातल्यामुळे मृत्यूचे प्रमाण देखील वाढले आहे. पुणे शहरात दुचाकी वापर करणाऱ्यांची संख्या मोठी आहे, परंतु हेल्मेट वापराचा अभाव जाणवतो. राजकीय पक्ष आणि काही संघटना हेल्मेट वापर सक्तीला विरोध करतात, परिणामी फक्त शहरातील सीसीटीव्हीच्या आधारे हेल्मेट न घालणाऱ्या दुचाकीस्वारांवर कारवाई केली जाते.
दिवसागणिक वाढणाऱ्या अपघातांना आळा घालण्यासाठी विभागीय आयुक्तांनी काही महिन्यांपूर्वीच सर्व शासकीय कार्यालयातील कर्मचाऱ्यांसाठी हेल्मेट बंधनकारक करण्याचे आदेश दिले होते. आता PMC चे अधिकारी आणि कर्मचारी यांना सुद्धा या आदेशांचे पालन करणे बंधनकारक असेल.
PMC च्या आवारात प्रवेश करताना हेल्मेट न वापरणाऱ्या कर्मचाऱ्यांवर महाराष्ट्र नागरी सेवा नियमांतर्गत शिस्तभंगाची कारवाई करण्यात येणार आहे. यामध्ये दंड आकारला जाईल तसेच दंडाची नोंद सेवापुस्तकात करण्यात येईल, असे स्पष्ट करण्यात आले आहे.
अतिरिक्त आयुक्त प्रितीराज बी. पी. यांनी दिलेल्या आदेशांचे पालन न केल्यास संबंधित विभागप्रमुखांवर देखील कारवाई होईल.
महानगरपालिकेच्या या निर्णयामुळे पुण्यातील दुचाकीस्वारांमध्ये हेल्मेट वापराविषयी जागरूकता वाढेल, अशी अपेक्षा व्यक्त करण्यात येत आहे. रस्ते सुरक्षेसाठी प्रत्येकाने स्वतःहून या नियमांचे पालन करणे आवश्यक आहे.
