तिरुचिरापल्लीहून शारजाहकडे जाणाऱ्या एअर इंडिया एक्सप्रेसच्या विमानात उड्डाणानंतरच तांत्रिक बिघाड आढळून आल्याने मोठा अपघात टळला आहे. बोईंग 737 हे विमान सुमारे 141 प्रवाशांसह उड्डाण करत असताना त्याच्या लँडिंग गियरमध्ये बिघाड झाल्याचे लक्षात आले. पायलटने तातडीने निर्णय घेत सूज्ञपणे विमानाला सुरक्षित लँडिंग करण्याचा निर्णय घेतला. या कठीण प्रसंगात पायलट आणि क्रू मेंबर्सच्या धाडसाने मोठी दुर्घटना टळली आहे.
सुरुवातीला विमानाच्या तांत्रिक बिघाडाची माहिती मिळाल्यानंतर तिरुचिरापल्ली विमानतळावर हाय अलर्ट जारी करण्यात आला. एअरपोर्ट प्रशासनाने तातडीने अॅम्बुलन्स आणि अग्निशमन दलाची तैनाती केली. या आपत्कालीन परिस्थितीत पायलटने परिस्थितीचे उत्तम नियोजन केले. प्रवाशांच्या सुरक्षिततेसाठी त्यांनी सर्वप्रथम विमानातील इंधन नियंत्रित करण्याचा निर्णय घेतला. आकाशात सुमारे 120 मिनिटे हवेत घालवून त्यांनी सुरक्षित लँडिंग करण्यापूर्वी इंधन जाळून विमान हलके केले.
या कठीण प्रसंगात पायलटच्या सूज्ञतेमुळे आणि धाडसामुळे सर्व प्रवाशांचे प्राण वाचले. प्रवाशांना तिरुचिरापल्ली विमानतळावर परत आणल्यानंतर सर्वांनी सुटकेचा निःश्वास सोडला. विमानातील प्रवाशांसाठी हा अनुभव अत्यंत भीतीदायक होता, परंतु पायलटच्या चातुर्यामुळे मोठा अनर्थ टळला.
एअरपोर्ट प्रशासनाने दिलेल्या माहितीनुसार, विमानात टेक ऑफ झाल्यानंतरच तांत्रिक बिघाडाचा इशारा मिळाला होता. विमानाचे लँडिंग गियर बंद पडल्याने ते सुरक्षित उतरवणे अशक्य झाले होते. मात्र, पायलटने बिघाड दूर करण्याचे प्रयत्न सुरू ठेवले. अखेरीस, काही वेळानंतर बिघाड दूर करून विमानाची सुरक्षित आपत्कालीन लँडिंग करण्यात यश आले.
या घटनांनंतर पायलटच्या कामगिरीची प्रशंसा होत असून, प्रवाशांनीही त्यांचे आभार मानले आहेत. एअर इंडिया एक्सप्रेसच्या विमानातील या तातडीच्या कार्यवाहीने अनेकांना दिलासा दिला आहे.
